Taj Gibson-a'n inkhelh a chawlhsan

Memphis Grizzlies player Taj Gibson chuan inkhelh a chawlhsan thu a puang a, Gibson hian court chhungah player angin a inlan leh tawh dawn lo. Chutihrualin a club hlui Chicago Bulls tan assistant coach hna a thawk chhunzawm dawn.

Kum 41 mi Gibson hian Thawhṭanni zan khan a chawlh thu puangin, "Vawiin hi ka tan chuan a harsa takzet. Basketball hian ka suangtuahnate a takah a chantir avangin, Kum 17 zet NBA-a hun ka hman chhung khan ka theihtawp ka chhuah ṭhin.

Ka chhungte, ka ṭhiante, ka teammate, coach, agent leh min ṭantute zawng zawng chungah ka lawm a, ka zinkawng duhawm takah hian hmun pawimawh tak in chang a ni. Mahse hei hi a basketball-a ka tawpna tur a ni lo a, thawnthu thar ziahin a awm dawn chauh," a ti.

Feet ruk leh inches kuaa sang Gibson hi a khelh tawhna club hrang hrangin thlahna thu an post bawk a, an player hlui hi zahna an lan tir thiam hle.

Gibson hi kum 2009 khan Bulls chuan draft pick-ah an thlang a, season riat a awm chhungin match 562 zet a khelhsak hman a, Bulls tana inlan hnem lamah 10-naah a lang pha hial.

Kum 2016 khan Gibson hi Doug McDermott nen Bulls-in Oklahoma City Thunder-ah an kaltir a, a aiah Joffrey Lauvergne, Anthony Morrow leh Cameron Payne bakah 2018 second round draft pick an nei thung.

OKC tan season chanve chauh a khelh hnuah Minnesota Timberwolves-ah kal lehin season hnih a khel a, hemi hnu hian New York Knicks, Washington Wizards, Detroit Pistons leh Charlotte Hornets-ah te a khel kual leh a, season hmasa khan Grizzlies tan khelin a club hnuhnung ber a ni zui.

American power forward hian match 1012 zet a khel hman a, mahse NBA nomawi a kawl loh bakah All Star-ah thlan a ni miah lo bawk. Mahse hei hian a ropuina a tihnep phah lo.

Gibson hi season thar atan a club hlui Bulls a zawm leh nghal a, head coach Tiago Splitter nen 1994 hnua a vawi khat nan Bulls chu champion pui an tum dawn.