Coutinho leh Neymar khel dun dawn

Brazilian midfielder Philippe Coutinho chuan season tawp thleng khel turin Santos FC a zawm a, Liverpool midfielder hlui hi ram tana a khelhpui ṭhin a ṭhianpa Neymar Jr. nen an khel duh leh dawn.

Kum 34 mi Coutinho hian February thla khan Vasco da Gama chu rilru lamah harsatna a neih avangin a chhuahsan a, hemi hnu hian a inkhel leh tawh lo. Santos tan Neymar nen an inkhelh dun leh dawn avangin mipui ngaihven a hlawh

Tun thla tir khan Brazilian club hian Coutinho hi lak an duh thawm a lo awm tawh a, an coach Cuca pawhin Liverpool midfielder hlui chuan a zawm duh a nih chuan ṭha taka an lo dawnsawn tur thu a sawi. Neymar pawhin an hotute hnenah la lut turin a hrilh bawk.

Santos chuan instagram-ah Coutinho leh Neymar te naupan lai thlalak an post a, hetiang chiaha gym-a thla an lakna chu an tarlang tel bawk. Coutinho-a'n dressing room a lut lai an dah tel bawk a, Neymar chuan lo kuahin, "Hei hi mumang a nih chuan, harh chhuah ka duh lo," a ti.

Bayern Munich tan pawha khel tawh Coutinho hian jersey no. 11 a ha dawn a, Neymar nen an inṭhianṭhat viau rualin club pakhat tana an khelh dun vawi khatna tur a ni.

Season hman mekah Santos hian beisei an pha lo a, Brazilian Serie A-ah 13-naah an awm mekin relegation zone aṭangin point sarih chauhin an him. Paris St-Germain forward hlui Neymar pui tura Coutinho a awm tawh dawn avangin an team boruak a ṭha sawt ang.