Spanish GP track siam ṭha dawn

Spanish Grand Prix intlansiakna hmun Madring chu Pathianni zana inelna an neih zawh hnuah, sawiselna a nasat avangin an thlak dawn a, race track-a thuneitute chuan nakkum inelna neih leh hunah a danglam tawh tur thu an sawi.

Team ṭhenkhat a thuneitu leh driver tam takin Madring chu tlan hrehawm an tih bakah, inlehpelh a harsa an tih thu an sawi. Race track lama thuneitute chuan F1 leh FIA chungah a hmun chu nakkum inelna neih leh hmaa an peih hman lo a nih pawhin, intlansiakna hmun dang an hman tur thu an hrilh.

Inelna neih zawh taka hnehna changtu Andrea Kimi Antonelli chuan, "Midang lehpel zung zung turin hmun a zau ṭha tawk lo a, kan tum lui a nih chuan bang emaw driver dang nen kan intai nghal a ni mai. Chuvangin siamṭhat ngai lai chu a awm chiang a ni," a ti.

Driver dang pawhin Madrind hi sawiselin, Williams driver Alex Albon chuan tlan hrehawm a tih thu a sawi a, Audi driver Gabriel Bortoleto chuan fiamthu titakin, an intlansiak laiin a mut a chhuah thu a sawi bawk.

Intlansiak hi kar khat an chawl leh phawt dawn a, September 26, Inrinni tlai dar 4:30-ah Azerbaijan GP an neih chhunzawm dawn. Spanish GP sawiselna a tam a avangin Azerbaijan GP an neihna hmun tur, Baku City Circuit lama an hotute chuan pressure an neih a rinawm.