Pro Fight a hmuhnawm chho zel

Mizoram Labour Link LPS Pro Fight 2026 zan rukna chu Thawhṭanni zan khan LPS Arena, Falkland-ah neih chhunzawm a ni a, inhnek 12 awmah match rukah technical knockout hmuh tur a awm.

Thawhṭanni zan hian mipui ngaihven hlawh Lalremthanga Hmar chu a inlan a, comedian hriat hlawh Remthanga hian boruak siam hle mah se Ratu tlangval Malsawmtluanga a ngam meuh lo a, round hnihnaah technical knockout hmangin a chak lo.

Malsawmtluanga bakah hian Moses Lawmkimthanga, Lalṭhazuala, Barnaba Lalmuanpuia, James VL Khawngaihkima leh Lalremtluanga te chuan TKO hmangin hnehna an chang bawk a, an match dawt leh atan inrintawkna a pek a rinawm.

Lightweight inhnekah Ṭhazuala a hmuhnawm takzet a, Edenthar boxer hi a khingpui Lalramsawna lakah chungnung tluan zakin round hnihnaah TKO hmangin a chak. A inhnek leh turah en bik a sual lo ang.

Ani bakah hian Pro Fight vawi khat telna Thangbiakdik a che ṭha a, Manipur boxer hian tawnhriat nei lo mah se a khelh ṭhat avangin fighter of the night-ah thlan a ni.

Unanimous leh Split decision-a chak pathum ve ve an awm bawk a, boxer ten hma an sawn avangin inhnek class sang tak tak leh inhnehtawk tak hmuh tur a tam hle.