Tu nge Max Dowman chu?

Max Robert Dowman hi December 31, 2009 khan Chelmsford, England-ah a piang a, kum riat a nihin Arsenal academy a zawm. Theihna a neihsan avangin Jack Wilshere kaihhruai Arsenal Under 18-ah September 2023 khan a tel ṭan a, kum 13 mi chauh a la ni.

September 19, 2024 khan UEFA Youth League-ah Dowman hian Atalanta lakah goal a khung a, kum 14, thla riat leh ni 19 mi chauh niin inelnaa goal khung naupang ber record a siam. Amah hi Arsenal ṭantu chhungkuaa piang a nih avangin Gunners ṭantu a ni a, club tan a hlu leh zual.

Season liam taa Arsenal-in Premier League an champion-na turah pawh khel tam lo mah se a thawh hlawk. March 14, 2026 khan Gunners-in Everton an hmachhawn a, minute 74-naah bench aṭangin Dowman hi a lut a, minute 89-naah Dowman-a cross chu Viktor Gyokeres-a'n a khung.

Toffees-in siphurh sut tumin na takin an nawr a, hun tawp dawnah corner kick-ah Jordan Pickford chawpin an chhuak vek. Hei hi khawvelin Dowman a hriat ṭanna chu a ni.

Corner kick aṭanga ball per chu Dowman-a'n changin kum lamah naupang mah se a inthlahrung lo. Dowman hian anmahni lam box pawn aṭangin a khalh ṭan a, amah chuhtu hmasa ber Vitaliy Mykolenko chu awlsam takin a bum a, halfway line thlen hmain awlsam hmel takin Kiernan Dewsbury-Hall a paltlang leh a, hemi hnu hian chak taka khalhin goal ropui a khung.

Arsenal chak nemnghehna goal khungtu Dowman hi kum 16 leh ni 73 mi chauh a ni a, Premier League-a goal khung thei naupang ber a ni. Vanglainiin headline-ah, "Arsenal hnenah Premier League nomawi hlan ru!," tih thupuiah a hmang a, season tawpah Gunners hnenah nomawi hlan a ni ta bawk.