Taekwondo-a India aiawh tur Nupuii

International School Games-a India aiawh tur thlannaah Vanlalthlamuanpuii (Nupuii) chuan 53 kg hnuai lam category-ah a khingpui hneh vekin ram pum huap aiawh tura thlan a ni. Inelna hi Rio de Janeiro, Brazil-ah December 3-8, 2026 hian neih a ni dawn a, Zemabawk nula Nupuii hian India ai a awh ang.

India aiawh tur thlanna hi September 15, Thawhlehni khan Raipur, Chhattisgarh-ah neih a ni a, Nupuii hian Delhi aiawh chu quarterfinal-ah 5-0, 4-0 in an hneh nghal. Semifinal-ah Himachal Pradesh nula tum lehin 13-0, 16-0 in an sawp. Final-ah Uttarakhand nula Aastha Joshi a hmachhawn a, National champion ni lai nen hian intum tawk hle.

Joshi hian a veikhawrna a hmang ṭangkai a, Nupuiin harsa takin round khatna chu 1-0 in a la hram a. Uttarakhand nula hian chawlh hmang ṭangkaiin round hnihnaah a technique a thlak thut a, hun tawp dawnah a zawna chiang tak pet fuhin 0-7 hma a hruai a, Nupuii a insiamṭha hman lo.

Final round-ah Nupuiin a tumpui a hrechiang tawh a, a invenhim piah lamah point a hmu let thei bawk a. Joshi hian point hnih hmu mah se a thungrul ve zel a. Hun tawp dawnah Uttarakhand nula hi a che sual a, a hunah tak Nupuii hi chefuhin 3-2 in a lehthal a, Brazil kal turin a tling.

Lalhmingthanga fanu Vanlalthlamuanpuii hi Children Guiding School, Ṭhuampuiah a kal a; Guwahati SAI, NCOE-ah training lai mek. Nupuii hian national level-ah medal ṭhahnem tak la tawh a, kumin chhung ringawt pawh gold medal pathum a la tawh. Ram pawn inelna lamah pawh tawnhriat nei tawhin kumin April thlaa neih 2026 World Taekwondo Junior Championship-ah pawh khan India aiawhin Tashkent, Uzbekistan-ah a zin a, under 55 kg-ah khelin round of 32 a thleng.

Nupuii te kalna tur International School Federation(ISF) buatsaih Gymnasiade - International School Games-ah hian sports discipline pakua an awm a; chungte inelna te chu athletics, beach volleyball, chess, judo, karate, taekwondo, wrestling, virtual cycling leh virtual rowing te an ni. Zemabawk nula Nupuii hi Mizo zinga tel hmasa ber tur a ni.