MPL tidanglam theitu Kanan harhtharna

Star Cement MPL13-ah Thawhlehni zan khan Kanan FC leh Ramthar Veng FC te 1-1 in an inhnehtawk. Table mawngphaha awm Kanan FC hian chak la nei lo mah se an match hnuhnung pahnihah chak loh an nei lo a, Mizoram Police bakah Ramthar Veng lakah point khat ve ve an hlawh chhuak.

RG Stadium-a inkhelah Ramthar Vengin J. Lalbiakliana (Valpuia) hmangin khung hmasa mah se Kananin Malsawmzela (Valpuia) hmangin an sut. Coach C. Zothantluanga (Apuia) kaihhruai Kanan an khel ṭha chhunzawm a, chak phu zawk ni mah se an vanneih ṭum a ni lo.

Zan boruak

Durtlang Football Stadium-a round li khelh a nih hnuah RG Stadium-ah MPL khelh a ni leh ta a, zan boruak hnuaiah inkhel en tur chhawpchhuah a ni. Kananin Mizoram Police laka point an hlawh chhuah avangin inrintawkna an nei let tih a lang a, an khel pawh a nung ṭha hle.

Kanan midfielder Lalrempuia a hmuhnawm a, yard 30 vel aṭanga hla aṭangin goal lamah a pet thut a, Ramthar Veng keeper Joel B. Lalramchhana'n chet dan tur hre tawh lo mah se goal ban a per. Kanan forward Vanlaldinpuia'n ṭha taka a lakluh hnuah box pawn aṭangin goal ban a pet per leh bawk.

Kanan striker Valpuia'n a tauh lut teuh a; midfielder David Laltlansanga freekick pet ṭha chu keeper Ramchhana'n a nam per hnuah K. Lalruatfela'n goal-ah volley mah se Ramchhana'n a dang hman leh tho.

Valpuia Show

Table mawngphaha awm Kanan khel a hmuhnawm a, chak phu khawpin khel ṭha mah se goal khung an harsat. Ramthar Veng lamin hrem vanga MS Dawngliana khel thei lo an tuar. Second half-ah erawh Ramthar Vengin chance an insiam thei a, Armed Veng South tlangval Valpuia'n box pawn aṭangin minute 51-naah a pet lut. Kanan keeper H. Lalrinzuala'n khawih mah se a beng chhuak thei lo.

Kanan defender te an tlu sawp a, mah se an indawm kun rei lo. Minute 61-naah Kanan striker Valpuia'n ball a um lut a, box chhungah luh puiin amah umtu bum tuma a lai kawi chiah chu defender Eddie Lalhmangaihzuala'n a rawn su a, goal-ah a lir lut. Keeper Ramchhana dem theih a ni lo.

Chak tumin team pahnih an innawr chhunzawm a, team pahnihin Valpuia an nei ve ve a, an khel ṭha ve ve a, goal an khung ve ve a, chance dang pawh insiam zui ve ve mah se an khung thei tawh lo thung. 1-1 in inkhel a tawp a, table mawngphaha awm Kanan an vanduai zawk.

Kanan harhtharna

MPL ṭan hmain Kanan FC-in I Day Football final an lut a, MPL13-a sawp bur niin an lang lo. Mahse, Kanan hian match hmasa pangaah an chak lo vek a, goal 17 chhuahin goal hnih chiah an khung.

Kanan hi an khelh dan avangin 'match fixing' nena sawi zawm an ni hman hial. Mahse, Kanan an insiamrem a, an theihna tak tak nena an khelh hnuah erawh point hnih an hlawh chhuak a, vanneih ṭum ni se, hei aia tam hlawh chhuak tur an ni.

Coach Apuia hote che ṭha hian MPL13 a ti ngaihnawm sawt dawn a, round sarih khelh tur a la awm avangin relegate chiang tia sawi tur a awm loh ang bawkin semifinal inchuh boruak a sang dawn. An point hmuh dan aṭanga teh chuan champion lai Chanmari meuh pawh semifinal lut chianga dah an rem lo.