Pro Fight : A tam zawk an in knockout

Mizoram Labour Link LPS Pro Fight 2026 chu Thawhlehni zan khan LPS Arena, Falkland-ah neih chhunzawm a ni a, zan sarihnaa inhnek 11 awmah mi paruk chu knockout hmangin an chak a, unanimous, split decision leh walk over thlengin hmuh tur a awm vek.

VL Malsawmzuala, Lawmsangpuia, Lawmsangzuala leh Samuel Zadeng te chuan an khingpuite an kncokout vek a, hnehna chang turin round hnih aia rei an mamawh lo vek. Anni bakah hian Benjamin Lalrindika leh Vanlalmal-sawmdawngliana te chu technical knockout hmangin an chak bawk.

Tyson Vanlal-hruaimawia, ITI Veng leh Ramhlun North boxer Lalruatfela te chu unanimous decision-in an chak a, Rangvamual boxer Alfred Lalrinsiama chu zan sarihnaah split decision-a chak awmchhun a ni.

Anni bakah hian C Lalhriatpuia leh VMS Tluanga te chu an khingpuite an inlan loh ve ve avangin walk over hmangin an chak a, zan sarihnaah hian boxing-a inhneh dan hmuh tur a kim thawkhat.