Inhnek ngaihven hlawh tam zan

Mizoram Labour Link LPS Pro Fight 2026 zan kuana chu zanin hian LPS Arena, Falkland-ah chhunzawm leh a ni dawn a, inhnek 11 awm turah Flyweight leh Lightweight an tam ber dawn.

Fly leh light-ah hian inhnek pathum ve ve a awm dawn a, inhnek hmasa ber tur Chin Lion Sate, Myanmar chu a vawi khat nan a inlan dawn. Myanmar boxer hi kumin inelnaah India pawm aṭanga inlan hmasa ber tur a nih avangin ngaihven a hlawh ang.

Light-a inhnek tur hnuhnung ber turin nghahhlelh a hlawh a rinawm a, a vawi hnih nan Lalnunthara a inlan leh dawn. Muallianpui boxer hian a match hmasa berah Lallawmzuala, Bethlehem Veng chu first round-ah a knockout nghal a, a lakah mipui beisei a sang.

Bantamweight-ah inhnek pahnih a awm dawn a, inhnek hmasa turah Englianthanga a inlan leh dawn. Englianthanga hian a match hmasa zawkah a khingpui a inlan loh avangin walk over-in a chak a, zaninah Vairengte boxer Lalfakzuala lakah a theihna tak tak lantir a tum dawn.

Hei bakah hian Welterweight-ah inhnek pahnih a awm dawn a, inhnek hnuhnung ber tur middleweight-ah pakhat a awm dawn bawk. Middle inhnek tur hi Siamlaljuia, Churachandpur leh Bilkhawthlir boxer Lalmuanpuia te niin, Manipur leh Mizoram inhmachhawn angah a kal theih avangin boruak a nun leh a rinawm.

Inhnek hi a hmunah Rs 50 chawiin a en theih a, LPS YouTube channel-ah member tan en theih a ni bawk. Member nih man hi Rs 179 chauh a ni.