Elche lakah Real an him hram

Thawhlehni zan La Liga inkhelah Real Madrid chuan 3-2 in Elche an hneh hram a, Jose Mourinho naute hian goal hnih an khung hnuah, goal hnih dang an chhuah leh avangin harsa takin hnehna an chang.

Real hian Elche keeper Matias Dituro own goal bakah, Kylian Mbappe leh Carlos Espi te hmangin goal an khung a, Elche tan Abiel Osorio leh Fer Nino ten an khung bawk.

Inkhel ṭan aṭangin Real an hlauhawm zawk a, Dean Huijsen, Mbappe leh Vinicius Junior ten chance ṭha an hlah nghal. Arda Guler erawhin a hun ṭha neih a hmang ṭangkai a, free kick aṭanga goal ban a pet per chuan Dituro fuhin goal-ah a lut a, a team hma a hruaipui.

Los Blancos bawk an hlauhawm chhunzawm a, minute sarih hnu lawkah Vini Jr. cross chu Mbappe-a'n awlsam takin a khung leh nghal a, nuamsa taka Real chak mai tura ngaih a ni.

Goal hnih an khung hnuah Real hian chance vawi tam an hlah a, Elche-in an vaw let. Minute 71-naah Osorio-a'n tauh lutin an siphurh a sut ṭhen phawt a, minute 83-naah Fer Nino chuan an siphurh a sut zo a, an phur thar hle.

Mahse Real an beidawng bik lo, injury time-ah Mbappe chuan Espi tan pein Spanish forward hian goal ruakah khungin an chakna goal a ni zui. Kum 21 mi Espi hian tun season-ah Real chakna goal vawi hnih a khungna a ni.

Real hian September 20, Pathianni zan dar 7:45 hian Atletico Madrid nen an inhmachhawn dawn a, Madrid derby an khelh hmaa an match hnuhnung bera an chak hi an tan thil lawmawm tak a ni.