Bissouma-a'n Ajax a zawm

Mali international midfielder Yves Bissouma chu club nei loa a awm vang vang hnuah, Eredivisie club Ajax a zawm a, Brighton & Hove Albion midfielder hlui hian tun season tawp thleng khel turin contract a ziak.

Kum 30 mi Bissouma hi season hmasa tawp rual khan Tottenham Hotspur-a a contract a tawp ve nghal a, sawmtu ngah hle mah se club dang a zawm lawk lo. Mahse a tawpah Ajax a thlang a, a contract hi tun season bakah kum khat dang pawhsei theih turin an inrem.

Ajax technical director Jordi Cruyff chuan, "Player tawnhriat nei ṭha tak kan la lut a, inelna sang tak tak a lo khelh tawh avangin kan tan a ṭangkai dawn. Position hrang hrangah a khel thei a, a inkhel lai kan hmuh thuai kan beisei," a ti.

Bissouma hian Mali club Real Bamako-ah a career a ṭan a, 2016 khan French club Lille zawmin kum hnih a khelhsak hman. 2018 khan Brighton chuan la lutin Premier League a khel a, khawvelin Bissouma an hriat ṭanna a ni.

Seagulls-ah kum li a châm chhung match 112 a khel hman a, goal thum chauh khung mah se a thiamna hi goal hmanga teh chi a ni lo. Bissouma hian khelmualah a theihna zawng zawng a hlan ṭhin a, an khingpuite dang chattu ber leh goal venhim kawnga tha thawhtu ber a ni ṭhin.

Brighton tan a khelh ṭhat avangin club tam takin lak luh an duh a, an zingah Aston Villa, Liverpool leh Manchester United te pawh awm mah se Spurs zawm a thlang a, 2022 khan London club a zawm.

Spurs tan kum li a khelh chhungin Europa League-ah a champion pui a, nomawi pakhat chauh chawi mah se kum 17 hnua Spurs nomawi chawi hmasak ber a nih bakah final-ah United an hneh avangin a hlu bik.