Argentina squad-ah Messi

Inter Miami forward Lionel Messi chu ram tan inkhelh chawlhsan tawh mah se, Argentina-in October-a Benin nen friendly match an khelh turah a hming a lang tel a, Argentina chuan Messi hi zahna nena thlah an duh vang a ni.

Argentina FA president Claudio Tapia chuan, "Khawvela player ṭha ber sawm leh hi kan duh a, a phu ang ngeiin October 6, Thawhlehniah kan ram chhung ngeiah hian kan thlah ang," a ti.

Kum 39 mi Messi hian August 31 khan ram tan inkhelh a chawlhsan thu a puang a, an ram tan engkim a hlan tawh a, pek leh chuan tur nei tawha a inhriat loh avangin a boot a khaisan.

Messi hian La Albiceleste tan match 207 inlanin goal 125 a khung a, ram tana inlan hnem ber leh goal khung hnem ber a ni kawp. 2022 World Cup a champion pui bakah Copa America nomawi vawi hnih a chawipui a, Finalissima nomawi pakhat a lakpui bawk.