Sage chungah Palace chairman lawm lo

Crystal Palace chairman Steve Parish chu Inrinni-a Ipswich Town laka an tlawm ṭuma, an manager Pierre Sage-a'n defender Jaydee Canvot squad-ah a dah duh lo chu a hrethiam lo a, a lungawi lo hle niin khawthlang chanchinbute chuan an ziak.

Kum 20 mi Canvot hian season hmasa khan French club Toulouse aṭangin Eagles hi a zawm a, a la naupan ngaihtuahin khelmualah a puitling takzet. Palace tan vawi 23 inlan tawhin tun season-ah match thum a khel tawh bawk.

Mahse Sage chuan Canvot hi Ipswich lakah squad-ah pawh a dan lo a, hei hian sawi zui a hlawin clun chairman Parish-a ngaihdan a ni lo hle. Mahse Kum 47 mi Sage chuan French defender a khelhtir loh chhan chu, an match hnuhnung bera Fulham an hneh ṭuma a khelh ṭhat loh vang a nih thu a sawi thung.

Canvot hian season hmasaa Marc Guehi-a'n Manchester City a zawm hnuah phei chuan rinrawl a ni tawh a, Europe-a defender hmabak nei eng ber zinga mi a ni mek. Ani bakah hian Tractor Boys (Ipswich sawina) lakah an chak loh ṭum hian Dwight McNeil leh Evann Guessand te pawh a luhtir lo.

French manager Sage hian tun season aṭangin Oliver Glasner thlakin Selhurst Park-ah a insawn a, league match li khel tawhin vawi khat chiah a la chakpui. FA Cup leh Conference League chawitu Austrian manager hi Sage tan thlak a awlsam dawn lo.

Eagles hian zanin dar 12:30-ah Lech Poznan nen Europa League-a an match hmasa ber an khel dawn a, hliam vangin Dean Henderson, Chadi Riad leh Jean-Philippe Mateta te chu inlan lo tur chiang sa an ni a, Eddie Nketiah dinhmun a chiang lo bawk. Sage-a player thlan danin ngaihven a hlawh ang.