Magic-in Banchero chhuahtir dawn lo

Orlando Magic chuan an forward ṭhangduang Paolo Banchero chu chhuahtir an phal lo a, Golden State Warriors-ah ngat phei chuan an kaltir loh tur thu an sawi. Banchero nena sawi zawm Warriors tan hriat a nuam lo ang.

Tun hnaiah Warriors chuan Banchero hi an duh tih thawm a awm a, a aiah Jimmy Butler, Yaxel Lendeborg leh first round pick pek tel an huam nia sawi a awm bawk. Mahse Magic chuan Banchero chelh an duh zawk avangin, thil danglam tak a thlen loh chuan a chhuah a rinawm tawh loh.

Khawthlang chanchinbu ṭhenkhat chuan Warriors hian, Banchero an la thei dawn a nih chuan Stephen Curry nena inthleng pawh an pawi ti lo niin an ziak hial. Mahse Warriors hotute chuan Curry chawlh hmaa championship title an lak leh theih nan Banchero nen khelh duntir an duh avangin an inthleng a rinawm chiah lo.

Kum 23 mi Banchero hian season hmasa khan match tinah Magic tan point 22.2, rebound 8.4 leh assist 5.2 nei ziah ang a ni a, Warriors chuan an club a khel turin an hmu tai hle.

American power forward hi 2022 NBA draft-ah khan Magic hian an club-a khel turin an thlang a, a career-ah club dang tan a la khel lo. Eastern Conference club hi nomawi la chawipui lo mah se, vawi khat chiah playoff khelh phâk lo a nei a, club tan innghahna ber pakhat a ni tawh.

Magic hian tun nipuiah Nikola Vucevic an la lut a, an neih sa Jonathan Isaac leh Jevon Carter te an chelh thei bawk. Izaiyah Nelson chu two way contract an ziahpui bawk a, playoff aia sang thlen an tum ngam ang.