Chanmari tan mualpho nawn zan?

Durltang Football Stadium-ah Ramthar Vengin Chanmari FC an chelh a, 2-2 in an inhnehtawk. Star Cement MPL12-ah Chanmari leh Ramthar hi zanin dar 7:00 hian RG Stadium-ah an inhmachhawn leh dawn a, Rochhingpuia hote hi chak chiang saa dah a rem lo.

IFL club Chanmari FC-in MPL13-ah vawi thum chiah chak hmel an la hmu a, club dang nen a record a danglam lo. Aizawl FC-in vawi nga hnehna an chang tawh a; Mizoram Police, MLS leh Dinthar ten vawi thum hnehna an chang tawh. Chhinga hote hian Dinthar FC an hneh loh hnuah Ramthar Veng leh Aizawl FC nen an inhnehtawk a, Nilaini zan khan Kanan lakah 1-0 in an chak hram.

Chanmari hian training-na hun ṭha an nei lo a, Ramthar Vengin inpuahchahna hun ṭha an nei zawk. An intawn hmasak ṭuma hnawhchhuah Ramthar Veng forward MS Dawngliana leh Chanmari midfielder Michael Lalbiaksanga ten hremna an hmang zo tawh a, anni pahnih hi inkhel hmuhnawmna belhchhahtu tur an ni ang.