Pacquiao-a'n honorary doctorate degree a dawng

Philippine Normal University (PNU) chuan division pariata world boxing champion ni thei Manny Pacquiao hnenah Nilaini khan Doctor in Physical Education and Sports an hlan. Kum 47 mi PacMan hi senator hlui a nih bakah National Anti-Poverty Commission (NAPC) Lead Convener a ni mek.

Boxer ropui Pacquiao chuan, "Ka tan chuan malsawmna ropui tak a ni a, Philippine Normal University hnenah doctorate degree min hlan avangin an chungah ka lawm hle. Kan nunah hian thil mak danglam tak tak a thleng fo a, hetiang dawn hi ka beisei ngai lo. Mahse, beiseina neia kan thawhrim a, inngaihtlawmna nena beidawng loa kan thawh hram hram chuan rah ṭha a thlen ṭhin," tiin a sawi a, a hlawhtlinna chu ṭhalaite fuihtu ni thei se a duh thu a sawi.