Robert-a leh Nunkima tan fiahna

Mizoram Labour Link LPS Pro Fight 2026 zan 10-na chu zanin dar 8:00 hian LPS Arena, Falkland-ah neih chhunzawm a ni dawn a, zaninah bout 11 en tur a awm leh dawn.

Lightweight-ah inhnek pathum a awm dawn a, ngaihven hlawh vek tur an ni. Tuipui Ferry boxer LV Robert Lalengliana'n North Lungpher boxer Vanlalpekhlua a hmachhawn dawn a, Robert-a hian a match hmasa zawkah Hmunpui boxer Gabriel Lalruatfela a knockout tawh a, inrintawkna a ngah phah ang.

Robert-a te inhnek hnuah hian Onminlen a inlan leh dawn a, Manipur boxer hian a inhnek hmasak zawkah split decision-in Chakhei boxer Beikhaizachhi a lo hneh tawh. Zaninah Onminlen hi Bethlehem Vengthlang tlangval Malsawma'n tuk dawl a tum dawn.

Lightweight inhnek hnuhnung berah Lalnunkima'n East Lungdar tlangval David Malsawmzela a hmachhawn dawn. Sialhau boxer Nunkima hian September 11, Zirtawpni zan khan Kawlchaw West boxer K. Lalremruata chu round khatnaah a knockout tawh avangin a zam dawn lo.

Flyweight inhnek pathum bawk a awm dawn a, Bethlehem Vengthlang boxer Lalsawmliana leh Vincent Khongsai, North Molhai, Manipur te an inhmachhawn dawn. Boxer pahnihte hi kumin inelnaa an vawi khat inlanna tur a nih bakah, Mizoram leh Manipur inhnek a nih dawn avangin boruak a nun nghal a rinawm.

Bantamweight-ah inhnek pahnih a awm dawn a, inhnek hmasa zawk turah vawi khat chak tawh Lalrinsanga, Thingsulthliah leh vawi khatna atana inlan tur T. Lallawmkima te an intawng dawn. Anni bakah hian vawi khat chak tawh tho Lalruatsanga leh Zohmun tlangval Lallawmawma te an inhmachhawn dawn bawk.

Pro Fight vawi 12-na hi a hmunah a en theih a, ticket Rs 50 chauha lei tur a ni. LPS YouTube channel-ah member tan a en theih bawk a, member ni turin Rs 179 chawi a ngai thung.