Zomuana'n goal 10 a khung tawh

Star Cement MPL13-ah Aizawl FC striker Zomuansanga'n match sarih lek aṭangin goal 10 a khung tawh a, I Day Football top scorer hi MPL top scorer ni nawn thei dinhmuna a din bakah record thar siam leh thei dinhmunah a ding. Season liam ta khan Zomuana hian match 18 a khung a, season khata goal khung tam ber record a siam.

Khawbel tlangval Zomuana hian MPL12-ah khan hrem vangin match hnih a khel lo a, Aizawl FC-in match 17 an khelhah match 15 inlanin match li chauh a nei. Season liam ta khan round 7 thlengin match ruk a khel a, goal riat a khung. Kuminah Zomuana'n phase 1 chinah goal 10 a khung tling der tawh a, amah hnaihtu Laltlanzova, Aron Suanngaihmuana, Malsawmfela leh K. Lalremmuana te aiin goal rukin a khung tam tawh zawk.

Chutihrualin MPL12-ah khan MPL13 aiin goal a lut tam zawk a, round 7 khelh zawh a nih khan goal 100 a lut. Kuminah 90 a lut a, season liam ta aiin goal a lut tlem zawk. Goal hi football tihmuhnawmtu ni mah se goal a luh tam uchuak erawh chuan league tan a hrisel lo.

MPL11-ah khan match fixing vangin club leh player ṭhahnem tak an hrem a, season khata goal luh tam ber ṭum thlengin league round-ah ringawt goal 206 a lut. MPL league round-a goal 200 aia tam a lut tlin hmasak ber leh awmchhun a ni.