Chanmari chakna TZ-a goal

Star Cement MPL13-ah Chanmari FC-in Nilaini zan khan Saikhamakawn an hmachhawn a, hun tawp dawna Lalthanzuala goal hmangin Rochhingpuia hoten 1-0 in hnehna an chang. MPL champion lai Chanmari hian match sarih aṭangin point 12 an hlawh chhuak a, pathumnaah an awm. SKK erawhin point ruk chauh an hlawhchhuah avangin relegation zone-ah an awm thung.

RG Stadium-a inkhelah Chanmari FC-in hrem vanga match hnih khel thei lo Michael Lalbiaksanga bul an ṭantir a, SKK pawhin hliam vanga inlan thei lo goalkeeper Lalhruaitluanga Kawlni leh defender Jonathan Lallianchawia te aiah keeper Lalhruaizela leh defender C Lalrinnunga te an luhtir a, Vanlalthanga aiah amah ang bawka tawnhriat nei ṭha Joseph Lalṭhafela a inlan bawk.

SKK keeper Hruaia'n insiamrem turin hun a mamawh a, Chanmari lam goal bawh a nat bawk avangin coach Rindika leh hote tan ngaih ṭha taka awm theih a ni lo. First half-ah goal hmuh tur a awm lo a, Aron Vanlalrinchhana'n crossbar a pet per erawh a goal teuh viau.

Second half-ah Chanmariin an nawr chhunzawm a, Hruaia'n hna ngah deuh mah se a tihtur a ti ve zel. SKK lamin second half-ah captain Malsawmdawngkima corner kick leh freekick hmangin chance nei ve bawk mah se goalkeeper Zothanmawia (T. Mawia) an ti buai pha lo.

SKK ṭang rei thei viau mah se a tawpah an ṭang tluan thei ta lo. Vei lam aṭanga Aron-a cross ṭha chu TZ-a'n mawi zetin minute 86-naah Chanmari goal pawimawh a khung. Rindika hote tan tlarhnung tihphui a ṭul a, defender Samuel H. Lalhlimpuia awmna leh taksa dah dan dik lo hlek an tuar.

Hun tawp hmain SKK-in risk lain na takin an nawr a, freekick leh corner kick hmangin Chanmari tlarhnung rum ṭhaih mah se goal an sual chhuak zo lo. Rochhingpuia hote hi 1-0 in an chak a, pathumna nichungin phase 1 an khar ang.