MPL : Phase 1 leh phase 2 a danglam ṭhin em?

Mizoram chhunga football inelna sang ber Mizoram Premier League-ah hian league round-ah vawi hnih ṭheuh an inkhel chhuak ṭhin a, round 7 a zawh hian vawi khat ṭheuh an inkhel chhuak chiah a, season tawpa table awm dan tur a hriatthiam theih ṭhin. Star Cement MPL13 phase 1 khelh zawh a ni a, tehfung atana MPL12 hmangin tun season chawhnu lam thlir lawk ta ila.

League round-a pakhatna nomawi chawi turin Aizawl FC dinhmun a ṭha a, Mizoram Police leh Chanmari FC te tan lehthal a harsa dawn. Chutihrualin Police leh Chanmari te hi semifinal lut turin an buk a rit chho hle. MPL12-ah khan phase 1-a a sang palia awm chinin semifinal an khel vek a, hei erawh a thleng nawn leh ngei ang tih a sawi theih loh thung.

Tun dinhmunah MLS palinaah an awm mek a, an hnuaia awm Dinthar FC, Ramthar Veng FC leh Saikhamakawn FC te tan knockout stage khelh phak theih kawng a la inhawng zau. Chutihrualin Kanan tan erawh semifinal khelh phak a harsa dawn a, relegation zone chhuahsan tur erawhin kawng a la inhawng zau thung.