Barca hmaa ding zo an awm lo

Spanish champion Barcelona chuan tun season-ah hnehtu an tawng lo a, Nilaini zan La Liga khelhah an chak kaltluang lai chhunzawm turin Racing Santander chu 7-2 in an sawp.

Catalan club tan Raphinha-a'n hattrick a siam a, Joao Cancelo, Gabriel Jesus leh Lamine Yamal ten goal khat ṭheuh an khung bakah Racing forward Asier Villalibre-a'n an lamah a tilut bawk. Racing tan Maguette Gueye leh Yassir Zabiri te chuan goal khung mah se, an mualpho tur pawh a hliah zo lo.

Barca an ṭha

Spotify Camp Nou-a inkhelah dan pangngaiin Barca-in ball an chang tam a, goal khung turin hun an mamawh rei lo. Minute riatna lekah Cancelo-a'n box pawn aṭangin goal mawi bik a khung a, Barca an hawikir tawh lo.

Minute 25-naah Raphinha-a'n penalty aṭangin an hmahruaina a belhchhah. Minute nga hnu lawkah Racing-in Gueye hmangin an siphurh an sut ṭhen ve a, mahse Barca chhaih kawlhtu mai a ni.

Minute 42-naah Cancelo shot chu Villalibre-a'n dang pialin an lamah a tilut a, Racing keeper Julen Agirrezabala dem theih a ni lo. First half tawp hma hretin Raphinha bawkin an goal lina a khung leh a, Brazilian forward goal hi striker pangngai goal khung awma mawi a ni.

Inkhel chawhma lam ringawt thlirin chak tur a chiang der tawh a, Barca-in goal li an khung bakah goal khat chiah an chhuah a, Yamal-a'n penalty aṭangin goal khung hun ṭha a bawhpelh mah mah.

Champion lai

Second half-ah Hansi Flick-a naute bawk an hlauhawm a, mahse Racing-in goal an khung hmasa zawk a, Joan Garcia thlaktu Wojciech Szczesny tihsual vangin Zabiri-a'n an goal hnihna a khung.

Mikhual team-in mualneitu lehthal tumin beiseina nei thar mah se kawng engkimah Barca an tluk lo a, Minute 67-naah Raphinha-a'n Karim Adeyemi penalty hlawh chhuah chu hattrick siam nan a hmang.

Brazilian forward tan tun season-a a goal kuana a ni a, hetiang zat khung tur hian match ruk chauh mamawhin goal sarih khung tawh a teammate Yamal leh Real Madrid forward Kylian Mbappe te chungah a awm.

Leeds United forward hlui bawk a langsar chhunzawm a, kum 29 mi Raphinha hian a hnampui Jesus-a khung tur siamsakin Arsenal forward hlui hian mawi zetin a pet kual lut.

Hun tawp hma hretin Barca-in goal an khung leh a, Yamal-a'n penalty a hlah avanga a tihsual siamṭhain an goal sarihna a khung a, nuamsa takin Barca an chak.

Flick a lawm

Inkhel banah Barca coach Flick chuan, "ṭha taka bul ṭan hi a ṭhat rualin a tawp kan khar dan hi a pawimawh zawk. Racing hi khelh harsa tak an ni a, mahse kan khelh danah ka lawm a, ka player te ka chhuang takzet.

Player tinte thawhrimna khan min hneh a, kan thawhhona ṭha kha a hlu ka tih bakah inrintawkna min petu tur a ni," a ti. Catalan club hian September 20, Pathianni zan hian tun season-a che ṭha tak Sevilla an hmachhawn leh nghal ang.