Leonard-a'n a fapa vangin Raptors thlang

Los Angeles Clippers forward hlui Kawhi Leonard chuan club tam tak sawmna kara Toronto Raptors a thlanna chhan chu a fapa vang a nih thu a sawi a, a fapa tan Toronto-a insawn leh a nih thu a sawi.

Kum 35 mi Leonard hian 2018-19 season-a Raptors tan a khelh lai khan a fapa Karter Leonard chu a piang a, hemi hnu lawk hian Raptors champion puiin an champion-na point score tu a ni nghe nghe.

American forward Kawhi chuan, "He hmunah hian champion nawn leh tum ngawr ngawr vanga kir leh ka ni lo a, ka fapa vanga kir leh ka ni. Ka fapa pianna hmun a ni a, kir leh a châk thu ka bulah a sawi reng a, tunah chuan a kir leh ta. A bula ka sawi ṭhin ka hlawhtlinnate chu a mit ngeiin a hmu thei tawh ang," a ti.

Leonard hian 2011-a San Antonio Spurs tan a career a ṭan hnuah 2018 khan Raptors hi a zawm a, Eastern Conference club tan an champion nomawi hmasa ber chu Golden State Warriors hnehin a chawipui.

Raptors-in chelh duh hle mah se, season khat lek a khelh hnuah free agencyin Los Angeles Clippers-ah a insawn leh a, Clippers-ah kum sarih a khel hman.

Kawhi hi tun hnaiah Clippers-a khelh laia 'salary cap' chungchangah buaina a neih chu an chhui chhuak a, dollar 700,000 chawitir niin an suspend lo thung, Clippers neitu Steve Ballmer chu kum khat chhung an hrem bakah dollar maktaduai 30 chawi tura tih a ni bawk.

Tun nipuiah Kawhi hian Raptors a zawm leh a, a aiah Brandon Ingram leh Gradey Dick te chuan Clippers an pan ve thung. Kawhi hi inkhel thei lo tura hrem a nih loh avangin season thar aṭangin Raptors tan a inlan nghal thei dawn.