Villa chakna Abraham leh Barkley

Nilaini zan League Cup khelhah Aston Villa chuan 3-1 in Coventry an hneh a, Villa tan Tammy Abraham-a'n goal hnih khungin Ross Barkley chuan goal khat a khung bawk.

Coventry Building Society Arena-a inkhelah Abraham-a'n minute sarihna lekah an hmahruaina goal a khung a, mualneitu team tan Victor Torp-a'n sut mah se, Barkley-a'n a team hma a hruai nawnpui a, Abraham bawkin an chak nemnghehna goal a khung leh bawk.

Villa tan Chelsea player hlui pahnih hi team khaikhawmtu ber an ni a, Sky Blues (Coventry sawina)-in kawng engkima Villa an ngam loh chhan an ni. Coventry hi an mikhual aia an chungnunna chu foul neih hnem lamah chiah a ni.

Villa hian Chelsea aṭangin £65mtd-in Abraham hi an lalut a, club thar tana goal a khung hmasak berah hnehna a chanpui. Unai Emery hote hian season bul an ṭan ṭha lo a, Premier League-ah point khat chauh an la hmu. Unai Emery naute hian September 19, Inrinni tlai dar 5:00-ah Tottenham Hotspur an hmachhawn leh nghal dawn. Frank Lampard-a kaihhruai Coventry City hian bul an ṭan chhe lehzual a, Premier League-ah an la chak lo vek a, League Cup-ah Villa hneh loin an tla nghal.