Fans awm loa khel tur Al Taawoun

Saudi Pro League club Al Taawoun chu Al Hilal nen an inhmachhawn ṭuma, fans auh dan avangin hrem an ni a, an muala an match an khelh leh tur pahnihah entu awm loin an khel dawn a, pound 20,000 chawitir an ni bawk.

September 12, Inrinni zan khan Al Taawoun hian Al Hilal an mikhual a, nikum July-a car accident-a nunna chân, a ṭhianpa Jota hming lamin Portuguese midfielder Neves chu an au nawmnah a, Al Taawoun hi 6-0 in an chak lo zui.

Al Taawoun fans-in an auh laiin Neves chuan ngawi rengin a thlir a, a hnuah 'Pathianin a hmu reng che u' tih ni awm takin kut zaizirin a chhanglet.

Kum 29 mi Neves chuan inkhelh banah, "An haw hunah an thil tih theihnghilh ṭhak khan an ṭawngṭai loh hram ka beisei," a ti. Neves hi Jota ṭhian ṭha ber a ni a, amah hriatrengnan Portugal tan a hak no. 21 a ha a, Jota nena an inkuah lai tattoo a chhuttir nghe nghe.

Cristiano Ronaldo chuan Al Taawoun fans hi demin, damchhunga inkhel en thei tawh lo tura hrem tlak an nih thu a sawi ve bawk. Hetihlai hian Al Taawoun chuan thuchhuah siamin, "Hetiang chêtna hi engtikah mah pawm theih a ni lo a, infiamna huangah hian midang sawichhiat, hmusit, leh rilru tina zawnga chet hi thil dik a ni lo," an ti.