Minister-in vaimim nuaina khawl a hlan

AH&Vety minister C Lalsawivunga chuan nimin khan Saikhumphaia vaimim chinna hmunpui a tlawh a, chawhnu lamah Bána Kaih (Handholding) pilot project, ran chaw atana vaimim nuaina khawl leh tarpauline hlanna hun Vaphai community hall-ah a hmanpui.

AH&Vety department chuan Bána Kaih hnuaiah Saitual district-a Buhbàn leh Teikhang, Khawzawl district-a Khawhai, New Chalrang leh Rabung, Champhai district-a Vaphai, Tlangsam, Ruantlang, Khuangleng, Thekpui leh Tualchengah te contract farming an kalpui a, ran chaw tur vaimim leh bekang a chìntir a ni.

District pathuma khaw 11-a vaimim leh bekang contract farming kum thum chhung atan cheng nuai 408 ruahman a ni a, pilot project kalpuitu chhungkaw 530 an awm. Vaphai khua bikah chhungkaw 114-in vaimim an chíng a, Saikhumphai leilet ringawt aṭangin vaimim ṭín 20,000 vel, cheng nuai 100 vel man thar beisei a ni.

Vaphaia khawl hlanna inkhawmah C Lalsawivunga chuan, Mizoram sorkarin Vety, Horticulture, Agriculture leh Rural Development department-te thawkho turin hma a lak thu a sawi a, "Department pakhat chauh mal kal lo a, kut hnathawktute tana thawhho a pawimawh avangin hma kan la chho mek a ni," a ti a; sorkarin hmanrua a pekte chu ṭangkai taka hmang turin a dawngtute a chah.

AH&Vety Animal Feed Plant-ah kum tin vaimim quintal 3,600 vel mamawh a ni a, Vety department-in project an ruahman ang leh an beisei ang loneitute'n an thar a nih chuan, kum khat mamawh an thar theih an beisei a ni.