Arsenal an kal fal thei dawn em?

Premier League champion lai Arsenal-in champion zia nen bul an ṭan a, match li an khelh tawh aṭangin champion nawn tura ringtu an ṭhahnem nghal hle. Zanin dar 7:30 hian Gunners-in Brighton & Hove Albion hmachhawn turin Amex Stadium an tlawh dawn a, London club tan hmahruaina belhchhah theihna hun ṭha a ni.

Arsenal hian FA Community Shield-ah Manchester City sawpin bul an ṭan a, Premier League-ah match li khel tawhin an la chak vek a, Champions League leh League Cup-ah pawh chakin bul a ṭan. Mikel Arteta hoten duhthusama ṭhain bul an ṭan a, Seagulls lakah pawh inrintawkna an ngah dawn.

Kar laihawlah Gunners-in League Cup-ah Ipswich Town an hmachhawn a, Arteta-a'n player naupang zawk a luhtir chungin 4-2 in hnehna an chang. Goal hnih khungtu kum 16 mi Max Dowman a langsar a, Noni Madueke leh Mikel Merino ten goal khat ve ve an khung a, an che ṭha viau bawk.

Seagulls lakah erawh Arteta-a'n squad a thlak leh hlawk dawn a, Ipswich laka goal khungtute hi mamawh huna chhawr theih turin bench-ah an awm a rinawm zawk. Dowman pawhin theihna sang tak nei mah se Arteta-a'n a phurrit chhawng zângkhai a ngai tih a hria ang.

Arsenal-in Brighton lakah result ṭha tak an nei a, March 4, 2018 hnuah chak loh an nei tawh lo. Mahse, kumin March 4, 2026 thlaa an inkhelh zawhah Brighton manager Fabian Hurzeler chuan Arsenal chu inkhelh tum lo a, goal venhim leh chak tum tawpah a puh. German manager thukhawchang avangin zanin inkhel a nun phah dawn.

Seagulls hian Old Trafford an luhchhuah zo chiah a, Pascal Gross leh a ṭhianten Manchester United lakah inlehthalna ropui an thlentir. Hurzeler-a kaihhruai Brighton hian tun season-ah bul an ṭan chhe lo a, point sarih hmuin panganaah an awm mek. Man United hneh theitu Seagulls hian Gunners lakah pawh mangchhia thlen an tum ang.