Hlauhthawnnaa khat Manchester United

Manchester United-in Michael Carrick hnuaiah season bul an ṭan ṭha lo a, champion awlsam berna tura ngaih League Cup-ah hneh loin an tla nghal a, Premier League-ah 13-naah an awm mek bawk. Red Devils hian September 20, Pathianni zan dar 9:00 hian Fulham hmachhawn turin Craven Cottage an tlawh ang.

English manager Carrick-a'n Premier League-a result a nei ṭha tawk lo chungin League Cup-ah player chhawr tam loh zawkte a hmang ngam a, thutlukna huaisen ni mah se result ṭha an neih loh avangin thutlukna fuh a ni lo. Khelmual chhunga an result ṭha lo vanga an buaina belhchhah turin an player hmabak nei êng bik JJ Gabriel-a'n Old Trafford chhuahsan a tum.

Kum 15 mi Gabriel hi Brighton nen a vawi khat nana senior team-a inlan tura ngaih ni mah se English striker hian chhuah a ngiat avangin a inlan lo. Club lian Real Madrid leh Barcelona te bakah Premier League lama an elpui club-te pawh an inlar nghal. Gabriel chet dan mawi lo mah se theihna a neihsan avangin club lam an inbeng hniam a, chelh tumin a kaw tawpah an ṭang.

United tan khua a var hlei thei lo a, Craven Cottage-ah Carrick leh a hoten harhtharna thlen an tum ang. Premier League-ah clean sheet an la neih loh avangin Senne Lammens sawiselna pawh a ri ṭan a, tlarhnung tih phui hi Carrick-a hna hmasa tur a ni. Chutihrualin tlarhma lamah English manager hian thutlukna dik a siam a pawimawh bawk.

An khingpui tur Fulham-in season bul an ṭan fuh bik lo a, point khat chiah an la hmu. Chutihrualin an match hnuhnung berah Liverpool hmachhawnin Anfield-ah point khat an hlawh chhuak.