City tan kum 17 mi Samba a vul

Carabao Cup third round-ah Manchester City chuan Ningani zan khan Norwich City 5-0 in an sawp a, kum 17 mi Floyd Samba-a'n goal hnih khungin a langsar hle. Etihad Stadium-a inkhelah Rayan Cherki, Allan leh Ryan McAidoo ten an khung ve bawk.

Enzo Maresca hote hian fourth round-ah Manchester United hnehtu Brighton & Hove Albion an hmachhawn dawn. City hian League Cup-ah player naupang zawk chhawr mah se Championship club Norwich an hmachhawn avangin buaina an nei lo. September 20, Pathianni zan dar 6:30 hian Premier League-ah Man City-in Sunderland an mikhual ang.

Samba Show

Maresca-a'n Manchester Derby-a hnehna changtu starting eleven aṭangin player 10 hlawk a thlak a, Brazilian winger Allan bakah goalkeeper Geronimo Rulli leh club academy chhuak Samba ten a vawi khat nan senior team tan an inlan.

City an hmuhnawm a, Rico Lewis-a'n chance ṭha hmasa a hlah a, ball petu chu Samba a ni. Nikum FA Youth Cup final-a goal khungtu Samba hi Norwich tlarhnung tan buaina tham a ni a, ṭan phat aṭangin a hmuhnawm nghal hle.

Minute 29-naah Samba-a'n a tauh lut a, kum 17 mi lek ni chung siin awmna tur laiah tak a awm a, a siamtu hi vawi khat khelhna ve tho Allan a ni. Minute thum hnuah Rayan Cherki-a'n a khung a, Samba leh Ayyoub Bouaddi ten hna an thawk ṭha hle.

A goal zel

First half-ah Samba-a'n chance ṭha hlah mah se second half-ah City-in goal tam zawk an khung. Minute 48-naah Allan-a'n City tana a goal hmasa ber a khung a, minute 54-naah Samba-a'n goal kilah a hlai lut a, a kum la naupang mah se box chhungah a hriam hle.

City inkhel class a sang a, Norwich-in an chelh meuh lo. Minute 90-naah O'Reilly cross chu Lewis-a'n a dummy hnuah bench aṭanga lut kum 18 mi Ryan McAidoo-a'n chiang zetin a pet lut. Etihad Stadium-ah City 5-0 in an chak.

Fimkhur a ṭul

League Cup-ah nuamsa takin City an chak a, mual sir aṭangin Erling Haaland ten thlamuang takin inkhel an thlir. Pathianni zana an mikhual tur erawh Sunderland an ni dawn a, chetsual theihna a ni dawn.

Black Cats hian kartawp khan Arsenal 2-0 in an hneh lo a, vanneih ṭum ni se point hlawh chhuak thei tur an ni. Régis Le Bris hote hian season bul ṭan ṭha lo mah se season liam ta khan pasarihna an ni a, Europa League an khel pha.

Chutihrualin Maresca kaihhruai City hi tun season-ah an la chak vek a, nipui bazarah sum an hmang tam a, squad a chhah ṭhat bakah Eithad Stadium-a khel tur an nih avangin chak ngei tura ngaih an ni.