India flag kengtu tur Bhaker leh Tajinderpal

Asian Games vawi 20-na hawnna chu vawiin tlai dar 2:30 hian Aichi-Nagoya, Japan-ah neih a ni dawn. Tun ṭum inelnaah hian a vawi khat nan raltlan (Asian Refugee Team) an tel dawn a, ART chhiar tel hian team 46 an tel ang.

Opening ceremony-ah hian India tan flag kengtu turte hi silai kap thiam Manu Bhaker leh shot putter Tajinderpal Singh Toor te an ni. Kum 24 mi Bhaker hian Olympic Games-ah bronze pahnih a la tawh a, World Championships leh World Cups-ah medal 23 la tawhin Asian Games leh Asian Championships-ah medal 12 a la tawh bawk.

Punjab tlangval Tajinderpal hi kum 31 mi a ni tawh a, Asian Games hnuhnung pahnihah shot put-ah gold a la ve ve. Asian Championships leh Asian Indoor Championships-ah pawh Tajinderpal hian ṭum hnih ve ve gold a la tawh bawk.

Kumin Asian Games-ah India chu athletics, cricket, shooting, hockey, kabaddi, rowing, badminton leh fencing-ah te a tel dawn. Hockey hmeichhe team-ah Mizo nula Lalremsiami Hmar chu India innghahna tur a ni ang.