Liverpool zawm tura thutlukna siam a awlsam - Isak

Sweden striker Alexander Isak chuan Newcastle United aṭanga Liverpool zawm tura thutlukna siam a awlsam thu a sawi. Reds hian Isak hi nikum nipui bazar tawp niah pound maktaduai 125-in an lalut a, British record fee a ni.

Mahse, Isak hian season liam ta khan Liverpool tan match 22 chauh khelin goal li chauh a khung a, beisei a phak lo hle. Kuminah erawh Isak a che ṭha a, Premier League match li aṭangin goal li a khung der tawh. Reds hian Pathianni zan dar 6:30 hian Bournemouth an tlawh dawn a, Isak-a'n hmun pawimawh a chang ang.

Kum 26 mi Isak chuan, "Liverpool ka zawm hi inchhirna ka nei lo a, heti zawng hian ngaihtuahna pawh ka hmang lo. Ka ke hliam vangin harsatna lian tak ka tawk a, chawl rei viau mah ila a êng zawngin a hma lam hun ka thlir ṭhin," tiin a sawi.

Reds hian Premier League nomawi chawipuitu Arne Slot an ban a, Andoni Iraola hoin season bul an ṭan. Liverpool-in match li khelh tawhah vawi khat chauh an la chak a, an khingpui tur Bournemouth erawhin Premier League-ah chak la nei lo mah se Europa League-ah Real Sociedad 2-1 in khualmualah an hneh thung.

Cherries hi Liverpool manager Iraola hming chherna a ni a, Pathianni zana an inkhelhna tur hi Vitality Stadium a nih bawk avangin Spanish manager hi mipui mit fukna tur a ni. Iraola hian Liverpool zawm san mah se Cherries ṭantuten Europe inelna khel thei tura chawisangtu chungah deusawhna ni loin zahna an lantir a rinawm zawk.