Match inhnektawkah Joseph-a a dingchang

Mizoram Labour Link LPS Pro Fight 2026 chu Ningani zan khan chhunzawm leh a ni a, welterweight-ah Joseph Lalmalsawma chuan Henry Lallianmawia chu split decision-in a hneh a, inhnek 11 awmah boruak nei lian ber an ni.

Ṭhuampui tlangval Joseph hi pro fight a vawi khat telna a ni a, mahnia inzir chawp a ni. A khingpui Henry pawh hi tawnhriat nei lo bawk a ni a, boxer pahnihte an inhnehtawk hle.

Joseph-a'n ṭantu a ngah a, Ningani zana inhnek zingah Ṭhuampui boxer hian thawm a nei lian ber. An inhnek tirhah Henry-a'n na takin a nawr a, a pumrua a ṭhat zawk avangin a chak a rinawm hman.

Mahse Joseph-a a insaseng zel thei a, hnek chhuak tam lo mah se a hnek chhun a ṭha thei hle. Boxer pahnihte hian inhnehtawk takin round thum an khel zo ṭhak a, Tuikual North tlangval Henry chu a nawrtu-ah ṭang chhunzawm mah se Joseph-a'n a inbum thei zel.

Round tawp lamah an chauh tawh avangin an hnek chhuak tam tawh lo a, judge pakhatin Henry chu chak zawkah ngai mah se pahnihin Joseph-a an chaktir a, Ṭhuampui tlangval a dingchang ta zawk. Joseph-a hian tawnhriat nei lo mah se a hmabak a êng hle.

Lightweight-ah Lalrohlua Pautu chuan sawizui a hlawh a, Kanan Veng tlangval hian round khatna minute khat leh second 27-na lekah Bawngkawn boxer Chuauzika chu technical knockout-in a hneh.

Zuitea Academy-a inzir Rohlua hi a khawng ṭha a, pro fight a vawi khat telna ni mah se state games-ah pawh a lo inlan tawh avangin, inrintawkna sang tak nen a inhnek a, en bik a sual lo ang.