Pro Fight : Barnaba a inlan leh dawn

Mizoram Labour Link LPS Pro Fight 2026 zaninah LPS Arena, Falkland-ah chhunzawm a ni leh dawn a, Barnaba Lalmuanpuia chu a vawi hnih nan bout riatnaah a inlan leh dawn.

Dulte tlangval Barnaba hi NTP Boxing Academy-a inzir a ni a, inzirna mumal tak a neih avangin ring chhungah inrintawkna a ngah. September 14, Thawhṭanni zan khan Kelsih boxer Jacob Lalrokima Khiangte chu round khatna lekah technical knockout-in a hneh tawh a, zaninah pawh en bik a hlawh leh ang.

Chutihrualin a hmachhawn tur Emmanuel Lalbuatsaiha hi a vawi hnih inlanna tur tho a ni a, match hmasa zawkah Muanna Veng boxer hian Khawbung tlangval Reuben Zothantluanga chu unanimous decision-in a lo hneh tawh.

An inhnek hmasak zawk hian Emmanuel-a a chungnung tluan zak a, Barnaba tan inhnek awlsam a ni dawn bik lo. Boxer pahniten inhnek hmuhnawm an chhawp chhuah ngei a rinawm.

Hetihlai hian bantam-ah Lalruatkima a inlan dawn bawk a, MMA lam thleng pawha tawnhriat lo nei tawh Rka hi Thenhlum boxer Vanlalhmingchungnunga nen an inhnek dawn.

Rka hi Falkland Veng tlangval a ni a, an vengah inelna hi neih a nih avangin 'home advantage' a nei thei dawn. Chutihrualin Vanlalhmingchungnunga hi Unanimous-a chak tawh a nih avangin zuam ngawt a thiang bik lo.