Mourinho tan fiahna hautak Madrid derby

Jose Mourinho-a'n tun kar tawpah fiahna hautak a hmachhawn dawn a, Pathianni zan dar 7:45-ah Atletico Madrid nen derby an khel dawn. Real Madrid hi an chak lo a nih chuan Atletico-in an lehpelh theih bakah, hmahruaitu Barcelona nen an inkar a zau tawh dawn - Mourinho leh a hote tan chak mai a fuh ang.

Hriatthiam har

Inelna hrang hranga Madrid derby an khelh hnuhnung pangaah Real an chungnung zawk a, vawi thum hnehna changin vawi khat an chak lo a, vawi khat dang an inhnehtawk bawk.

Tun season-ah Real hi vawi khat chauh an la chak lo a, match ṭhenkhatah nuamsa takin chak mah se vanneihna an mamawh châng a awm bawk. Champions League-a Inter Milan 2-1 an hneh ṭumin Real fans-in an player-te an au el hial.

Real tan chak ringawt a tawk lo tih a lang a, game an thunun loh chuan fans lawm a kim loh avangin Mourinho-a'n hna a ngah hle. An hmelma Barca an chet ṭhat bawk avangin hetiang kara Atletico hmachhawn hi Portuguese manager hian a thlang bik kher lo ang.

Inlan turte

Los Blancos tan Eder Militao, Rodrygo leh Ferland Mendy te chu hliam an neih vanga khel lo tur chiang sa an ni a, khel tur lo tur dang an awm lo thung. Elche laka bench-a awm Denzel Dumfries leh Jude Bellingham ten bul an ṭan a rinawm tawh bawk.

Spanish club lian innghahna tur ber erawh Kylian Mbappe a ni a, French forward hian season kal mekah goal sarih a khung tawh a, mahse Barca forward Lamine Yamal-a'n a nihrual bakah, Raphinha-a'n goal kua a khung tawh a, Mbappe-a'n lehpelh leh vat a duh ang.

Kum 27 mi Mbappe thlawp turin Vinicius Junior a awm a, Brazilian forward hian goal khat chauh la khung mah se assist pathum a nei tawh a, ven uluk a ngai leh dawn.

Atletico tan erawh thu lawmawm lo a awm a, Julian Alvarez chu a tihrawl na vangin a dinhmun a chiang lo. Argentine forward bakah hian Pablo Barrios leh Alexander Sorloth te an inlan thei lo mai thei bawk.

Chutihrualin an match hnuhnung berah an player thar pahih Jonathan David leh Lee Kang-in ten goal an khung ve ve a, World Cup champion Alex Baena bakah Ademola Lookman an la neih avangin mangang tur erawh an ni lo.

Engtin zel?

Elche laka an chak hnuah Mourinho chuan inkhel thunun a chak a duh thu a sawi a, Atletico lakah a chungnung zawk nih tumin thih thain an ṭan a rinawm. Mahse a awlsam dawn lo.

Atletico coach Diego Simeone erawh chuan Real hi an squad a chhah ṭhat avangin zuam chi an nih loh thu a sawi a, mahse a ṭang rei thei zawk an nih tur thu sawiin a ṭawng fimkhur hle.

Tun kar tawp inkhel a zawh hnu hian international break a awm dawn a, player ten an ram team an zawm leh dawn. Player ten chak lo chunga chawlh hman an duh dawn loh avangin an coach te ang bawkin a tlawm zawkah ṭan an hreh dawn a, inkhel hmuhnawm an chhawp chhuah a beiseiawm.