Pelicans-ah Bey a nghet

New Orleans Pelicans chuan an forward Saddiq Bey chu inremna thar an neihpui a, kum thum dang châm turin an thlung nghet. Bey hian kum thum chhung hian dollar maktaduai 55.5 a hlawh dawn.

Kum 27 mi Bey hian nikum July khan Pelicans hi a zawm ve chauh a, player pawimawh ni nghalin match 72 a khelh aṭangin vawi 64 bul a ṭan thei. Season hmasa khan match tinah point 17.7, rebound 5.6 leh assist 2.5 nei ang a ni.

Season hmasaah mimal takin Bey hian che ṭha mah se Pelicans hi playoff a khelhpui phâk lo a, Western Conference-ah 12-na an ni. Mahse Bey chuan hmun dang pan loa châm chhunzawm zel a thlang ta zawk.

American forward hian 2020 draft pick-ah khan Detroit Pistons chuan an thlang a, Pistons tan kum thum a khelh hnuah 2023 khan Atlanta Hawks-a zawm a, mahse March 2024 khan a ACL a tihnat a vangin season pum deuhthaw a chawl a, ngai a awh leh theih an beisei lo.

Mahse rim taka a thawh hnuah Bey a rawn kir a, nikuma Pelicans a zawm hnuah a theihna tak tak a lantir leh ṭan tawh. Dejounte Murray, Zion Williamson leh Trey Murphy III te nen an inkawp fuh dawn chauh niin a lang bawk.

Pelicans hian tun nipuiah Bennedict Mathurin, Caleb Houstan, Christian Koloko, Kobe Bufkin leh Trendon Watford te an la lut tawh a, veteran player DeAndre Jordan chu kum khat dang khel leh tura an chelh theih bawk avangin, season hmasa aia sang thlen theih an inbeisei ang.