Pressure ngah PSG hmaah Marseille

Ligue 1 champion lai Paris St-Germain chuan Pathianni zan dar 12:15-ah Olympique Marseille an lenchilh dawn a, tun season-a beisei pha lo PSG tan fiahna a ni dawn. Luis Enrique-a'n a naute hi a chakpui lo a nih chuan a dinhmun a nghing tawh ang.

Moroccan defender Achraf Hakimi chu a tihrawl na vangin a dinhmun a chiang lo a, hliam nei dang an awm lo. Mahse hei hi PSG tan pressure siamtu tur a ni a, an chak zawh loh leh chuan chhuanlam tur an nei dawn lo.

Tun season league match pali an khelh tawhah PSG hi vawi khat chiah an la chak a, vawi hnih inhnehtawk tawhin vawi khat dang an chak lo. Point 12 hlawh chhuah theih aṭangin point nga chauh an la nei a, champion lai an ni tih a hriat loh.

An buaina belhchhah turin an tlarhma a bil a, season hmasaa che ṭha tak Khvicha Kvaratskhelia, Ousmane Dembele leh Desire Doue ten Ligue 1-ah goal an la khung thei lo.

Chutihrualin Barcelona aṭanga an lak Ferran Torres-a'n insiamrem a mamawh lo a, inelna hrang hrangah goal ruk a khung tawh. Kum 26 mi Torres leh captain Marquinhos chu PSG mualpho lutuk tur hliahtu an ni a, Marseille lakah pawh an innghahna an ni leh ang.

Hetihlai hian Marseille pawhin beisei an pha bik lo a, vawi khat chiah hnehna la changin vawi li an tlawm tawh. Mason Greenwood leh Pierre-Emerick Aubameyang te chhuah hnuah a thlaktu tur an la nei lo.

French club lian pahnih hi an talbuai lai tak a ni a, zaninah a tlawm zawk an awm a nih chuan fans an lungawi tawh dawn lo a, anmahni enkawltute dinhmunin a tawrh phah dawn.