England squad-ah Stones tel lo

Inter Milan defender John Stones chu a malpuiah hliam a neih avangin, England coach Thomas Tuchel-a'n squad-a tel turin a ko lo a, September leh October inkara khelh tur Nations League-ah Stones a inlan dawn lo.

Manchester City defender hlui Stones hian Thawhṭanni zana Udinese an hneh ṭum pawh khan bul a la ṭan a, mahse hemi hnu hian a inhliam avangin team training pawh a zawm lo.

Three Lions coach Tuchel-a'n kum 32 mi Stones aiah, Everton defender Jarrad Branthwaite leh Como defender Trevoh Chalobah te a ko. Anni bakah hian centre back-a khel turin Marc Guéhi, Jarrell Quansah leh Ezri Konsa te an la awm avangin an ṭha thawkhat.

England hian tun international break-ah World Champion Spain an hmachhawn hmasa ber dawn a, Czech Republic vawi hnih an khelhpui dawn bakah Croatia nen an inkhel bawk ang.

Hetihlai hian Inter chuan zanin dar 9:30-ah AS Roma an lenchilh dawn a, Stones a khel ve thei dawn lo. England international a inlan theih dawn loh avangin Alessandro Bastoni, Yann Bisseck, Benjamin Pavard leh Manuel Akanji te mawhphurhna a sâng dawn.

Team pahnihte hi season kal mekah la chak vek awmchhun an ni a, goal difference ṭhat zawk vangin Roma-in hma an hruai. Hei vang hian tlarhnung bakah hmatawngte an pawimawh dawn a, goal ruk khung tawh Donyell Malen-a'n en bik a hlawh leh ang.

Zanina a chak zawk zawk hi hmahruaitu tur an ni a, Cristian Chivu naute hian Roma hmahruaina chhuhsak an duh a nih chuan thi leh thau pawlha an khelh a ngai a, goal hnih khung tawh Lautaro Martinez leh Pio Esposito te an pawimawh dawn.