Crystal Palace an chak nuamsa

Ningani zan Europa League khelhah Premier League club pahnih Crystal Palace 4-0 in Lech Poznan an sawp a, Pierre Sage-a'n Europa League-a a team a kaihhruai hmasak berah hnehna a chanpui nghal.

Selhurst Park-a inkhelah Eagles tan Yeremy Pino, Chris Richards ten hma takah goal an khung nghal a, Jorgen Strand Larsen chuan penalty hmangin scoresheet-ah a hming a nem kai bawk. First half-ah Eagles-in goal thum an khung tling der.

Polish club-in hun tawp thlengin goal an khung ve thei lo a, minute 87-naah red card an la hmu zui. Hun tawp hma hretin Eddie Nketiah-a'n goal khat a thawh ve bawk a, nuamsa takin Palace an chak.

Inkhel dangah Bournemouth chuan 2-1 in Real Sociedad an hneh a, Cherries tan Justin Kluivert leh Rayan ten hma takah goal an khung. Spanish club tan Sergio Gomez-a'n an siphurh sut ṭhen mah se, goal dang a luh tawh loh avangin Cherries an chak.

Cherries hian hnehna chang mah se Pathianni zanah Liverpool an mikhual leh nghal dawn a, Marco Rose-a naute tan an chak lawm ai chuan Reds hmachhawn tura inbuatsaih a fuh zawk ang.