City an chelh - a hmuaktu Liverpool

Manchester City tan Champions League round of 16 lut turin vawi khat chak tawk mah se an mikhualna ramah an chak zo lo a, Etihad Stadium-a 5-1 a an sawp hnu Atalanta chu 1-1 in an inhnehtawkpui. 

City hian kartawp Premier League-ah an elpui ber Liverpool an lenchilh dawn a, Pep Guardiola chuan, "Liverpool hneh thei tura inpuahchahna ṭha ber chu Atalanta laka ṭha taka khelh hi a ni," tiin a sawi lawk. Mahse, Nilaini zana an result-in a hrilhfiah chu City an inpuahchah ṭha tawk lo tih a ni a, UEFA-in Atalanta Stadium-a pawm loh avanga an khelhna San Siro Stadium-ah an tlangnel tawk lo. 

Pep-a'n Atalanta lakah result ṭha a duh thu a sawi ang ngeiin player a rem a, player langsar zingah Sergio Aguero leh Kyle Walker chiah bench-ah a dah. Spanish manager hian Europe-a an dinhmun chinfel hma a duh tih a lang tel a, minute sarihna lekah Rahhem Sterling chuan goal hmahruai a khung - Gabriel Jesus-a'n backheel flick hmanga a siamsak a ni. 

City-in first leg-a 5-1 a Atalanta an lo sawp tawh ngaihtuah chuan, 'Eng zat tak khung belh ang maw?' tih chu rilrua zawhna lo awm a ni a, mahse Atalanta player-ten ngaihdan dang an nei. Jesus-a'n 2-0 a City hmahruaipuina remchang a neihah penalty a pet goal lo a, Chelsea aṭanga loan-a Italian club pantu midfielder Mario Pasalic chuan minute 49-naah si phurh a rawn sut - City an hawihai. 

City goalkeeper Ederson-a'n hliam a neih avangin second half-ah lakchhuah a ni a, a thlaktu Claudio Bravo-a'n target-a shot a hmachhawn awmchhun a chhuah - minute 81-naah Chilean goalkeeper hi hnawhchhuah zui a ni. 

Pep-a'n Riyad Mahrez la chhuakin Walker chu goalkeeper turin a luhtir a, English defender hian Ederson leh Bravo aiin save a ngah zawk! Hliam leh red card vangin a tawpa vannei zawk City an ni a, match li aṭangin point 10 an nei. 

City boss Pep-a'n Ederson hliam chu,"A tihrawlah na a nei," tih bakin a sawi lo a, he thu buatsaih lai hian Brazilian goalkeeper hian Liverpool a hmachhawn theih dawn leh dawn loh a chiang lo. Midfielder pawimawh David Silva chu hliam vangin a chawl mek bawk a, City hian an ṭhat dan berin Reds an hmachhawn dawn lo niin a lang. 

Group C inkhel dangah Dinamo Zagreb leh Shakhtar Donetsk chu 3-3 in an inhnehtawk a, Shakhtar hian hun pek belhah goal hnih an khung! Atalanta-in club pahnih an la hmachhawn dawn a, beisei an la nei ve zel. 

Zagreb khelmualah Donetsk-in minute 13-na leka Alan Patrick goal hmangin hma an hruai a, mualneituin Bruno Petkovic, Luka Ivanusec leh Arijan Ademi hmangin an chhanglet - an goal thumna an khung hian minute 89-na a ni tawh. 

Mahse, Ukrainian club an beidawng lo. Junior Moraes leh Tete (penalty) te chuan hun pek belhah an si phurh an rawn sut a, a tawpah team pahnih hi 3-3 in an inhnehtawk daih! Inkhel boruak 'hot' takah red card vawi hnih phawrh a ni a, Zagreb lamah Nikola Moro chu minute 74-naah hnawchhuah a ni a, Donetsk lamah Marlos chu minute 79-naah hnawhchhuah a ni ve bawk.