Joao Pedro tel lohna Blues an mualpho

Xabi Alonso kaihhruai Chelsea an la insiamrem thei lo a, Zirtawpni zan khan Gtech Community Stadium-ah Brentford tlawhin 3-0 in an mualpho. Blues-in tun season-ah vawi hnih ngawt chak loh an nei tawh a, Bees erawhin chak loh an la nei lo.

Keith Andrews kaihhruai Brentford tan Jaidon Anthony, Igor Thiago leh Fabio Carvalho ten goal khat ṭheuh an khung. London club-in an striker chhuanvawr Joao Pedro hliam vangin an chhawr tel lo a, chhanletna tur an nei lo.

Alonso-a'n tlarhmaah Danny Welbeck a chhawr a, kum 35 mi hian ball a chan angte hloh meuh lo mah se vawi 17 chiah ball a khawih. English forward Welbeck-a'n ball a hmu ṭha tawk lo a, chutihrualin Joao Pedro angin mahniin chance a insiam thei lo. Brazilian forward hian tun season Premier League-ah goal thum a khung bakah assist vawi thum a nei tawh a, a awm lo hi Chelsea-in an tuar hle.

Chelsea hian season hmasa lam aṭangin set piece hmachhawn an thiam lo a, Alonso pawhin a la siam ṭha thei chuang lo. Season liam ta aṭang khan set piece aṭang ringawtin goal 23 an chhuah a, Premier League club zingah set piece aṭanga goal chhuah tam ber an ni. Bees lakah pawh Anthony-a'n corner kick aṭangin awlsam takin a tauh lut a, set piece aṭangin goal nga an chhuah der tawh.

Blues defender Levi Colwill chuan, "Kan ti ṭha tawk lo a, kan penalty area-ah kan khingpuite kan ngam ṭhin lo a, hmasawn ngei kan mamawh. Chutihrualin kan set piece coach kan ring tawk a, a ngaihtuah thar angte hmang chhuak thei turin kan insiamrem mek," tiin a sawi.

Spanish manager Xabi Alonso chuan, "First half-ah kan khel chhe lo a, mah se second half-ah chak duhna kan nei tlem ta deuh a ni. Thil ho te hian danglamna a thlen ṭhin a, chu chu team pahnih danglamna a ni. Chhuanlam siam ka tum lo a, keimahni ṭheuh kan inen ang a, hmasawnna tur kan hre thei ang," tiin insiamṭhat an mamawh thu a sawi.

Chelsea hian tun season Premier League-ah goal 10 khung tawh mah se goal 12 an chhuah tawh a, an goal difference -2 a nih avangin tlarhnung enfiah a ṭul. Alonso-a'n goalkeeper Robert Sanchez thlak nan Emiliano Martínez a lalut a, Argentine keeper pawhin danglamna a la thlen thei rih lo.