Pro Fight: Lalruatkima a chak nghal

Mizoram Labour Link LPS Pro Fight 2026 zan 10-na leh 11-na chu Zirtawpni zan leh Inrinni zan khan LPS Arena, Falkland-ah neih chhunzawm a ni a, bout 11 ve ve awmin inhnek boruak a sang zel.

Inrinni zan

Zan 11-naah Lalruatkima a langsar ber a tih ngam a, Falkland boxer hian a vawi khat inlannaah unanimous decision-in Malsawmdawngliana, Dawrpui Vengthar a hneh. Round tir lamah Rka hi a tlu zing deuh a, referee-in a count a ngai hial.

Mahse insiamṭha turin hun a duh rei lo a, second round aṭanga inhnek tawp thlengin a chungnung zawkah a ṭang tluan zak. A tawp thlenga a ṭan theih danah a fitness a ṭha tih a hriat a, Malsawmdawngliana'n knockout a pumpelh chu a vannei zawk hial.

Falkland veng tlangval hi a ban tawi zawk mah se a duai bik lo a, round thumna thlengin a vai chhuak hnem zawkah ṭangin a nawrtuah zawk a ṭang tluan a, fighter of the night-ah thlan a ni zui.

Rka hi a vawi khat pro fight telna chauh ni mah se MMA, Kickboxing leh Muaythai-ah lamah sulhnu a lo neih tawh avangin ring chhungah a tlangnel nghal viau. Inelna neihna hmun LPS Arena awmna hi Falkland a nih bawk avangin ṭantu a ngah fal a, 'home advantage' a nei bawk.

Elite Gym leh Boxing Hub-ah Rka tlangval hian training a nei mek a, Laldinsanga kalsan tak bantamweight champion kawnghren chu hlawh chhuak turin theihna sang tak a nei a – rinkai zingah a tel pha hial.

Inhnek dangah Emmanuel Lalbuatsaiha'n Barnaba Lalmuanpuia chu unanimous decision bawkin a hneh a, match inhnektawk tur taka ngaihah Muanna Veng tlangval Emmanuel-a a dingchang ta zawk.

Emmanuel-a hian Khawbung tlangval Reuben Zothantluanga chu unanimous decision-in a lo hneh tawh a, Reuben-a a hneh tawh ang bawkin Dulte boxer Barnaba lakah a chungnuung zawk.

Zirtawpni zan

Maubawk rawlthar Lalruatsanga'n bantamweight-ah Lallawmawma chu split decision-in a hneh a, inhnek an ṭan rualin Zohmun boxer Lawmawma'n a nawr nghalin chiang takin a hnek fuh nghal a, mahse Ruatsanga a talbuai lo.

Kum 18 mi Ruatsanga insiamṭhain a beui let a, inhnaih chilhah a hnek fuhtu zawkah a ṭang ngun zawk. Tharumah Zohmun boxer ṭha zawk mah se Ruatsanga-a'n a huaisen rah hmuin hnehna a chan bakah Fighter of the Night-a thlan a ni.

Middleweight-ah Churachandpur, Manipur boxer Seigoulal chuan round hnihnaah Lalremruata chu technical knockout-in a hneh a, Seigoulal hian round khatna tawp dawnah Remruata talbuai khawpin a hnek a, Bawngkawn rawlthar a ding tluan thei hram.

Round hnihna tirah Seigoulal-a'n nawr chhunzawmin Remruata'n a ban a tina palh a, second 24 chiah an inbei hman tihin technical knockout-in Churachandpur tlangval a chak a, round of 16—ah Tuithiang boxer Lalhriattira nen an inhmachhawn ang.