Mizoram Police an vannei lo, an ṭha!

Star Cement MPL13-ah Mizoram Police-in Inrinni tlai khan ruahsur hnuaiah Lawngtlai club MLS FC 1-0 in an hneh. Goal awmchhun hi defender Lalhmunmawia (Ahmuntea) khung a ni a, Police-in point thum hlu tak an hlawhchhuah avangin point 16 hmuin semifinal an hnaih tawh hle.

MPL10 champion Mizoram Police hian nomawi an chawi hnuah an tlahniam. MPL11-ah league round-ah point 19 hmuin semifinal an lut hram a, season liam ta khan point 13 chauh hmuin relegation playoff khel Kanan FC nen an point hmuh zat a inang.

Kuminah erawh Police team enkawltuten hna an thawk ṭha a, MPL ṭan hmain Mizoram hmun hrang hrangah player an zawng. Ṭum dang zawng aiin an squad a chhah ṭha a, starting eleven-ah Police-a nghet player leh civil player an inzat tawk ṭhin hle.

MLS lakah pawh Police-in MPL13 khel tura an lak Thingsai tlangval Lalramtluanga'n Malsawmfela hmun ruak zau tak a hnawh khat thei a, midfielder C. Zodinmawia leh tawnhriat nei ṭha R. Malsawmtluanga te an inkawp rem. Mual vei lama ke vei lama pet nghat Armed Veng rawlthar Lalrindika Sailo a rintlak a, thui tak thleng turin theihna a nei sang.

Chutihrualin tawnhriat ngah zawkte erawh a sa sehah an danglam leh ṭhin a, Msa ke aṭangin ball ṭha a chhuak tam a, chakna goal khungtu pawh defender tawnhriat nei ṭha Ahmuntea a ni. Police-in inkhel pumpui thlirin chak an phu a, match riat lekah point 16 an hmu a, eng club mahin Police hmachhawn an chak tawh lo ang.