Goal nga nen Kanan an tho!

Star Cement MPL13-ah table mawngphaha awm Kanan FC-in Inrinni zan khan an chung chiaha awm Saikhamakawn FC 5-2 in an sawp. Coach C. Zothantluanga kaihhruai KFC-in harhtharna an chang a, SKK lakah phase 1-a an goal khung zat aia tam an khung.

RG Stadium-a inkhelah Kanan tan C. Lalthlanawma'n goal hnih a khung bakah Malsawmzela, Lalbiakhlua leh Melvin Zomuana ten goal khat ṭheuh an khung. Saikhamakawn tana K. Lalremmuana leh Lalrothlanga te goal khungin mualphona a hliahkhuh zo lo.

Khelmual chhunga Kanan harhtharna hi match fixing boruak nen sawi zawm theih a ni tlat. MFA chuan September 15, Thawhlehni khan thuchhuah siamin Kanan assistant manager bakah player pahnih chu match fixing vangin Rs 10,000 chawitir an nih bakah kum thum chhung atana hrem an nih thu an puang.

Kanan hian thuchhuah neih hma hian point khat chiah an la hmu a, MFA-in player pahnih leh asst. manager an hremsak hnuah an result a ṭha zawk. KFC hian match hmasa pangaah chak lo vek mah se match hnuhnung pathum aṭangin point nga an hmu a, relegation zone chhuahsan turin beiseina sang tak an nei ang.

Saikhamakawn erawh ngaih ṭha taka awm thei an ni tawh lo a, tun hnaia an result thlir phei chuan semifinal thlir thei an ni tawh lo. SKK-in goalkeeper Lalhruaitluanga Kawlni (Bawihpuia) inhliam an tuar a, a thlaktu goalkeeper Lalhruaizela'n a hna a tlin lo. Chutihrualin SKK tlarhnung a pawp hrim hrim bawk a, Ramthar Veng an hmachhawn hmaa ni nga chhung training-na hun an neih an hman ṭhat a ṭul dawn a ni.