Barca chakna Raphinha hattrick

Spanish champion Barcelona-in hnehtu an la tawng thei lo a, Inrinni zan khan Sevilla chu an mualah 3-1 in an hneh a, Barca goal hi Raphinha khung vek a ni. Sevilla tana Youssouf Fofana goal khung chu scoreline cheimawina chauh a ni.

Inkhel chu

Ramón Sánchez Pizjuán-a inkhelah mikhual team Barca an hlauhawm nghal a, Lamine Yamal-a'n goal ban a pet per nghal dawp. Centre back Pau Cubarsi-a'n yard ruk vel lek aṭangin goal zawnah a pet thei lo bawk.

Mualneitu an insiamṭha hret a, minute 19-naah Félix Correia cross chu Fofana-a'n hnai tak aṭangin a chiang zetin a tauh lut a, Barca defender ten French midfielder hi an veng ṭha tawk lo.

Sevilla hlim chhung erawh a rei lo a, goal an khung aṭanga minute thumna lekah an chhuah ve nghal. Danish defender Andreas Christensen-a ball pek ṭha tak chu Raphinha-a'n um lutin, chiang zeta Arouna Sangante a bum hnuah cool takin an siphur sutna goal a khung.

First half-ah goal dang a lut lo a, a hlauhawm zawkah Sevilla an ṭang. Félix Correia-a'n ṭum hnih ngawt chance duhawm a hlah a, a nawrtu zawkah an ṭan avangin Barca vanduai ni a thleng dawnin a lang hman.

Hei le Raphinha

Second half-ah erawh Catalan club an insiamṭha leh nghal a, minute 52-naah Raphinha chuan an hmahruaina goal a tauh lut. Brazilian forward assist-tu Yamal-a'n fak a phu takzet.

Minute 69-naah Raphinha hian Yamal-a ball pek chu um lutin, Sevilla keeper Odysseas Vlachodimos chu cool taka pet khumin hattrick a siam a, an hmahruaina a belhchhah bawk.

Kum 29 mi forward hian corner aṭangin goal ban a pet ber bawk a, a vanneih zan ni se goal khung belh thei tur a ni. Barca tan Anthony Gordon, Dani Olmo leh Karim Adeyemi ten chance neih chhunzawm mah se Vlachodimos an paltlang thei tawh lo a, 3-1 in inkhel a tawp.

Barca an ṭha

Hansi Flick-a naute hian match sarih an khelh tawh aṭangin hnehna an la chang vek a, point 21 hmuin hmahruaitu an nih chhunzawm. An hmelma Real Madrid aiin point rukin an sang zawk a, mahse ni zana Madrid derby result a zirin an inthlauhna hi a danglam leh thei ang.

Catalan club hian nipui transfer-ah Ferran Torres, Marcus Rashford leh Robert Lewandowski te an chân avangin striker an nei lawk lo a, Raphinha chu no. 9 position chelhtirin a khel ṭha hle.

Transfer tawp hma hretin Gabriel Jesus la lut mah se Flick-a'n Raphinha a ring tlang a, Leeds United forward hlui hian goal 12 khung tawhin a pu beisei a tithlawn lo chiang hle a, a hnampui Jesus-a tan pawh nek chhuah a har dawn.