Monaco tan Brunner vul zel

Ligue 1 hmahruaitu AS Monaco tan Paris Brunner-a'n goal khung a bansan thei lo a, German rawlthar hian Zirtawpni zan khan an mikhual RC Lens lakah goal khung lehin a team chu 2-1 in a chakpui.

Kum 20 mi Brunner hian goal a khung hnuah Lens-in Matthieu Udol hmangin an sut leh a, an inhnehtawk dawna a lan laiin Lens defender Jonathan Gradit-a'n an lamah a tilut palh a, vannei takin Monaco an chak.

Brunner hi Borussia Dortmund academy chhuak a ni a, mahse Dortmund tan a inlan hmain 2024 khan Monaco hi a zawm. French club hian 2024-25 season khan loan-in Belgian Pro League club Cercle Brugge-ah an kaltir leh nghal.

Season hmasa khan Monaco tan inlan ṭanin match sarih khel vein goal erawh a khung lo a, tun season-ah an coach thar Filipe Luís hnuaiah a tan hun a inherchhuak a, Brunner-a'n a hun ṭha a bawhpelh lo chiang hle.

Season kal mekah German forward hian match nga khelin goal li a khung tawh a, a khelh ṭhat avangin international break hman leh turah pawh Germany U-21 chuan an ko a, senior team-ah erawh a la tel pha lo thung.