Bayern chak zanah Kane-a'n record siam

English forward Harry Kane chuan Zirtawpni zan khan Bayern Munich tan goal hnih a khung a, Bundesliga-ah goal 101 khung tling chiahin hetiang zat khung thei tur hian match 98 chiah a mamawh. Kane hi Bundesliga goal 100 khung thei tura match mamawh tlem ber a ni.

Allianz Arena-a inkhelah hian Kane bakah Michael Olise a langsar a, French forward hian hattrick a siam. Jamal Musiala leh an striker thar Ismael Saibari te chuan goal khat ve ve an khung.

Kum 33 mi Kane hian Tottenham Hotspur aṭanga Bayern tan a khelh hnuah a khel ṭha zual a, Bundesliga-ah Bavarians tan an goal khung khawl ber a ni. Amah hnaih bertu Cologne forward hlui Dieter Muller khan goal 100 khung turin match 129 a mamawh a, hei hian Kane ropuizia a tilang.

Spurs forward hlui chuan, "Ka lo kalna a la rei lo a, mahse helai hmun hi nuam ka ti takzet a, ka hlim bawk. Bundesliga-a goal 101 ka khung tling thei hi ka lawm takzet a, game khelh zat aia goal khung tam hi record ropui tak niin ka hria," a ti.

Kumin October 26-a sem tur Ballon d'Or dawng turin Kane hi rinkai ber a ni a, season hmasa khan inelna hrang hrangah match 51 khelin goal 61 a khung tling a, Bundesliga leh German Cup-ah a team a champion pui.

Hei bakah hian kumin World Cup khelh zawh takah khan an ram chu semifinal a thlenpui a, goal ruk leh assist pakhat neiin Three Lions tan a thawh hlawk ber zinga mi a ni.

Kane hian kumin chauh Bayern-ah contract a nei tawh a, Barcelona nen sawi zawm a ni mek. Mahse amah Kane ber hian Germany-a khelh zel a duh thu a lo sawi tawh a, inbiakna mumal tak an neih hunah Bayern sawmna a hnar a rinawm loh.