Inter chhanhimtu Lautaro Martinez

Inrinni zan Serie A inkhelah Inter Milan chuan AS Roma laka si hnih an phur hnuah, Lautaro Martinez-a'n goal hnih khungin an siphurh an sut zo a, 2-2 in team pahnihte an inhnehtawk.

Mualneitu Roma-in first half-ah Manu Kone hmangin goal hnih an khung a, French midfielder goal pahnih hi Paulo Dybala ke aṭanga chhuak ve ve a ni. Goal chhuah loa first half an hman tluan avangin, Inter vanduai ni a thleng dawn niin a lang hman.

Mahse Cristian Chivu naute an beidawng lo a, second half ṭan aṭanga minute khatna lekah Martinez-a'n tawih takin a pet goal a, an siphurh sut ṭhenin a team a tiphur thar.

Minute 79-naah Martinez bawk a inlar a, buai nuai nuai karah a ball chan chu Argentine forward hian chiang zetin a khung a, an siphurh a sut zo. Hun tawp hma hretin Marcus Thuram chuan counter attack aṭanga an hun ṭha neih chu goal zawnah a pet thei lo a, point khatah an lungawi a ṭul.

Team pahnihte hian season kal mekah hneh loh an la tawng lo ve ve a, match nga an khelh aṭanga point 13 ve ve hmuin goal difference nei ṭha zawk Roma-in hma an hruai chhunzawm. Anni bakah hian Lazio chuan point 13 bawk hmuin pathumnaah an awm.