City tlarhnung phui lo mah se an chak tho

Manchester City-in Pathianni zan khan Sunderland an mikhual a, goal thum ngawt chhuah mah se 5-3 in an chak tho. Inrinni zanah champion lai Arsenal an tawlhtluk avangin Enzo Maresca kaihhruai Man City chu Premier League hmahruaitu an ni.

Etihad Stadium-a inkhelah City tan Antoine Semenyo-a'n goal hnih a khung bakah Enzo Fernandez, Rayan Cherki leh Erling Haaland ten goal khat ṭheuh an khung. Sunderland tan Brian Brobbey hattrick tawk zo lo mah se Dutch forward khelh dan hi club lian beng a thleng ngei ang.

Goal a sur

Minute kuana lekah Enzo-a'n freekick aṭangin a khung nghal a, Argentine midfielder hian mual vei lam sir, box pawn chiah aṭanga a pet chungin goal-ah a pet lut tlat. Black Cats keeper Robin Roefs-a'n cross tura a ngaih avangin a dang hman lo.

Mahse maw, minute thum hnuah mikhual team-in mawi zetin City tlarhnung an ṭhiat a, Enzo Le Fée pass ṭha bik chu Brobbey-a'n ṭha zeta box chhunga lalutin siphurh sut nan a hmang.

City lamin Haaland leh Semenyo te hmangin na takin an nawr a, Rayan Cherki hmangin minute 29-naah hma an hruai nawn. Minute 33-naah Brobbey a rawn lang leh nghal a, Thomas Meunier pass chu Dutch forward hian a ti goal. Sunderland goal luh theih nana Le Fee-a'n Meunier-a ball a pek chu a class takzet.

Sunderland-in goal venhim an thiam tawk lo a, City lamin goal khung an thiam. Minute 43-naah Semenyo-a'n ball per chang fuhin, box chhung aṭangin kawh zetin a pet lut.

A goal zel

Second half-ah pawh goal hmu turin nghah rei a ngai lo a, Sunderland player-te ball inchuh buai karah Semenyo-a'n chance ṭha bik a nei a, minute 57-naah kawh zetin a hlap lut. Mahse, City nuam sain an awm hman lo.

Minute 59-naah Granit Xhaka killer pass chu Nilson Angulo-a'n changin Brobbey tan a pe nghal a, Sunderland striker hian goal ruakah a khung. City 4-3 in hma la hruai mah se goal khat chauha hma an hruai avangin Sunderland an phur thar phah hle.

Sunderland goal bawh a na a, Ruben Dias-a'n a tihsual vangin own goal teuh viau mah se amah bawkin a pet chhuak hman. Minute 81-naah City-in Sunderland tlarhnung an ṭhiat a, Haaland-a'n chak nemnghehna goal a khung. Assistant referee-in offside-ah ngai mah se VAR hmanga ennawn hnuah goal hi pawm a ni.

Champion tum ngam

Manager ropui Pep Guardiola chhuak mah se Enzo Maresca hnuaiah Manchester City-in champion an tum tih a lang a, Arsenal lakah pressure an pe nghal hle. City chiah hi English football-a league sang palia chak vek thei awmchhun an ni.

Maresca hi Premier League manager zingah Carlo Ancelotti, Craig Shakespeare, Maurizio Sarri, Ole Gunnar Solskjaer leh Pep Guardiola te hnua match hmasa pangaa chak leh thei hmasa ber a ni bawk.

City-in striker rintlak Erling Haaland an kawl a, Antoine Semenyo leh Rayan Cherki ten innghahna tlak an ni tih lantir a, Chelsea aṭanga an lakluh Enzo Fernandez-a'n hmun pawimawh a chang nghal. Maresca-a'n champion thei team a din a, season bul a ṭan ṭhat bawk avangin hmabak a êng hle.

Mahse, international break zawhah Man City-in Lvierpool an hmachhawn nghal dawn a, Champions League lamah PSG an mikhual dawn bawk. Maresca leh a hote tan fiahna pawimawh a ni ang.