Pro Fight: Zaninah lightweight hmuhnawm dawn

Mizoram Labour Link LPS Pro Fight 2026 zan 12-na chu zaninah LPS Arena, Falkland-ah chhunzawm leh a ni dawn a, zan khat chawlh a nih hnuah bout 11-in chhunzawm leh a ni dawn.

Zanin inhnek turah lightweight-in ngaihven a hlawh ber a, Thualthu boxer C. Lalmalsawma leh Vaphai boxer Malsawmkima te zanin lightweight bout hmasa berah an inhmachhawn ang.

Boxer pahnihte hi kumin inelnaah vawi khat ve ve an lo inlan tawh a, C. Lalmalsawma hian Vanhne boxer Tlanfamkima lakah unanimous decision-in hnehna a lo chang tawh. Malsawmkima pawhin Rangvamual tlangval Jeho Vanlalpekhlua chu unanimous decision bawkin a hneh tawh a, an intumtawk viau tura ngaih a ni.

An dawt chiaha inlan tur Lawmsangpuia chu mipui hmuh leh châk zinga mi a ni a, East Lungdar tlangval hian Chhingchhip Venghlun boxer Lalnunfela chu a inhnek hmasa zawkah a knockout a, round khat bak an khel hman lo.

Lawmsangpuia hmaa ding tur Lalrinhlua erawh a vawi khat inlanna tur a ni a, boxing ring-a tlangnel tawh sa Lawmsangpuia a hmachhawn dawn avangin chak turin a zam a thiang dawn bik lo.

Lightweight inhnek hnung ber turah Lawmsangzuala leh Lalrohlua te an inhmachhawn dawn a, a vawi khat inlanna aṭanga mipui ngainat hlawh Chekawn tlangval Lawmsangzuala hi match hmasa zawkah Knockout hmanga chakin a kut thlak na tak chuan sawizui a hlawh.

Dinthar boxer Lalrohlua'n Lawmsangzuala hi hneh a tum ve dawn a, chutihrualin Rohlua hi a vawi khat inlanna tur a nih avangin a fimkhur erawh a ngai dawn thung.

Zan 12-na khartu tur Ramhlun South boxer T. Lalchhuanawma leh Melriat boxer Jonathan Lalruathlua ten ngaihven an hlawh bawk a, boxer pahnihte hi an vawi khat inlanna tur ni mah se an rit tham tawh a, an kut thlak a nat bawk avangin a tawp kharna hmuhnawm tak a beisei ngam.

Pro Fight hi a hmunah Rs. 50 chauh chawiin a en theih a, LPS YouTube channel-ah member tan a en theih bawk. Member nih man hi Rs 239 a ni.