Madrid derby-ah Real an vanduai

Jose Mourinho-a'n Real Madrid a enkawl leh hnua Madrid derby a hmachhawn hmasak berah, Atletico Madrid hneh zo loin 2-1 in khualmualah an tlawm. Real hi vawi hnih an chak lohna chiah niin table-ah palinaah an tla.

Real defender Dean Huijsen-a'n chu hnawhchhuah a ni a, hemi hnu hian Atletico tan Grimaldo leh Jonathan David ten goal an khung. Real tan hun tawp dawna Rudiger-a goal khung chu scoreline timawitu chauh a ni.

A harsa

Riyadh Air Metropolitano Stadium-a inkhelah team pahnihte an fimkhur a, a nawr hmasatu zawka ṭan an hreh emaw tih tur khawpin first half-ah chance hmuh tur a tlem.

Chance hmasa ber hmu turin minute 40-na nghah thlen a ngai a, Arda Guler-a long shot chu Jan Oblak-a'n ṭha takin a dang. Hun tawp zui nghalin chawlhlawk an hman thlengin a chungnung zawk an awm lo.

Ennawm chu

Second half-ah erawh Atletico khel a nung a, Spanish forward Alex Baena-a'n Thibaut Courtois en chhin nghalin Diego Simeone-a'n half time-ah a naute a fuih ṭha tih a hriat.

Minute 49-naah Dávid Hancko ball vawrh luh ṭha zet chu Giuliano Simeone-a'n box chhungah a awma la thlain, a insiamrem hma chiahin Huijsen-a'n a pawt thlu a, referee Miguel Ángel Ortiz Arias-a'n penalty a pek bakah Huijsen chu yellow card a pe.

Mahse VAR-ah ennawn leh niin kum 21 mi Huijsen-a yellow card chu sut leh a ni a, mahse a aiah red card pein hnawhchhuah a ni ta zawk. Atletico ṭantute tan lawmna a nih laiin Real tan an lungngaih inṭanna chiah a ni.

Atletico an nung

Nipui laia Atletico zawmtu Alejandro Grimaldo-a'n cool takin penalty a khung a, a team hma a hruaipui. Kum 31 mi Grimaldo hi Barcelona academy chhuak a ni a, Real laka goal khung hi a tan a hlu bik ang.

Simeone naute an phur laklawh a, minute ruk hnu lawkah a fapa Giuliano cross chu Jonathan David-a'n khung lehin an hmahruaina a belhchhah. Atletico player tharten Real an ngam hle.

Hemi hnu lawk hian Cristian Romero tauh chu Courtois-a'n ṭha zetin a dang a, Julian Alvarez-a shot chu Ibrahima Konate-a'n line aṭangin a tauh chhuak bawk a, Real an mualpho lo hlauh.

Player kim lo leh goal hnih chhuah tawh Real an che hleithei lo a, Jude Bellingham, Kylian Mbappe leh Vinicius Junior te an bo. Yan Diomande-a chance neih chu Oblak-a'n a ṭhatzia tihlan nan a lo hmang.

An vanneih a siamin Rudiger-a'n minute 89-naah Bernardo Silva freekick pet aṭangin a tauh lut a, goal dang luh leh nan hun a awm tawh loh avangin an result pawm thiam bak Real-in tih theih an nei lo.