Milan tan Pulisic a lo kir

Christian Pulisic chuan tun season-a a vawi khat nan AC Milan tan bul a ṭan a, goal khung nghalin a team chu Lecce lakah 3-0 a chakpuiin rinrawl ni turin a ṭha tawk tih a pholang thar.

USA international Pulisic bakah hian French midfielder Adrien Rabiot leh Belgian full back Diego Moreira te chuan goal khat ve ve an khung a, Lecce-in hun tawp thlengin goal an khung ve thei lo.

San Siro-a inkhelah Pulisic hian minute 14-na lekah, keeper chauh a hmachhawn hnuin cool zetin an hmahruaina goal atan a khung. Milan-in thunun tluan zakin second half-ah Rabiot leh Moreira ten an khung belh.

Kum 27 mi Pulisic hi tun hnaiah a dinhmun a chiang lo nia sawi a awm a, club neitu Gerry Cardinale-a'n chhawr chhunzawm zel duh mah se a hma hun chu an head coach thar, Ruben Amorim-a kutah a awm tih a lo sawi tawh.

Kumin World Cup khelh zawh takah khan Pulisic hian round of 16-a Belgium an hneh loh ṭumin a ke a tihna a, Milan squad zawm tlai bikin pre season pawh a khel ve lo.

Season thara an match hmasa ber an khelh ṭum erawhin squad-ah a awm tawh a, mahse September 6, Pathianni zana Juventus nen an inhmachhawn ṭum thleng khan inkhel loin bench-ah a ṭhu tluan.

Tun hnaiah Milan match-ah American forward hi bench aṭangin a lut zeuh zeuh tawh a, bul a ṭan veleh a hun ṭha neih a khawhral lo chiang hle. Chutihrualin a teammate Alphadjo Cisse a chet ṭhat ve tho avangin, a inthlahdah thiang lo.

Borussia Dortmund forward hlui hian San Siro-ah tun season daih chauh contract a nei tawh a, kum khat dang pawhsei theih dan awm mah se hmun a chan tam loh chuan chhuah a thlan zawk a rinawm.